Trešū reizi padūtys Nikodema Rancāna bolvys

LaKuGa 26. Septembris, 2017. gods Comments Off on Trešū reizi padūtys Nikodema Rancāna bolvys

Gūdynojūt goreidznīka, pedagoga, sabīdryskuo darbinīka Nikodema Rancāna pīmiņu, 24. septembrī Viļānu kulturys nomā nūtyka trešuo N. Rancāna konkursa izcyluokajim Latgolys pedagogim nūslāguma pasuokums.

Nu 2. maja da 12. septembram sevkurs varēja pīteikt lobuokūs školuotuojus par pārnuo goda sasnāgumim N. Rancāna bolvai. Itūgod tyka sajimti 30 pīteikumi, kas ir leluokais pīteikumu skaits konkursa pastuoviešonys laikā.

Piec žurejis viertejuma tiks nūsacāti uzvarātuoji četruos nominacejuos. 

Nominacejā “Par myusdīneigu i rodūšu pīeju školānu dorbaudzynuošonai i omotu apvuiceibai” par N. Rancāna bolvys sajiemieju tyka nūsaukts Maltys vydsškolys školuotuojs Rihards Ciblis.

Nominacejā “Par veiksmeiguokū pedagoga debeju” apbolvuota Kaunatys vydsškolys školuotuoja Līga Uzulnīce. Specbolvu itamā nominacejā sajēme Bolvu profesionaluos i vyspuorizgleitojūšuos vydsškolys i Bolvu Bārnu i jaunīšu centra školuotuoja Aiga Jansone.

Nominacejā “Par inovacejom izgleiteibys procesā” N. Rancāna bolva tyka padūta Dagdys vydsškolys školuotuojai Aijai Babrei, bet specbolvys pīškiertys Viļānu vydsškolys školuotuojai Nellijai Gudai i Leivuona nūvoda Rudzātu vydsškolys školuotuojam Ēvaldam Kārklim.

Sovukuort nominacejā “Par īguļdejumu i sasnāgumim latgalīšu volūdys, kulturviesturis i nūvodu vuiceibys īvīšonā un īdzeivynuošonā školys/augstuokuos izgleiteibys īstuodis vuiceibu/ studeju vidē” bolvu sajēme Rēzeknis 5. vydsškolys školuotuoja Aelita Andrejeva. Specbolva itamā nominacejā – Rēzeknis vaļsts pūļu gimnazejis školuotuoja Ingūna Zeiļa.

Par latgalīšu volūdys i nūvoda vuiceibys styprynuošonu eipaša bolva padūta div školuotuojom – Baļtinovys vydsškolys školuotuojai, latgalīšu dramaturgei Anitai Ločmelei i pedagogei ar 70 godu stažu nu Ruguoju Margaritai Stradiņai.

Uzvarātuoji sajēme R. Cibļa veiduotū eipašū bolvu – sudobra pakavsoktu i cytys bolvys nu reikuotuoju Rēzeknis Tehnologeju akademejis, Latgalīšu kulturys bīdreibys i Viļānu nūvoda pošvaļdeibys.

Komentari slāgti.