Folklorys i kulturviesturis interesenti 23. oktobrī 14.00 teik aicynuoti iz Latvīšu folklorys kruotuvis (LFK) izbraukuma seminaru Latgolys Kulturviesturis muzejā, Rēzeknē, informej garamantas.lv redaktore Kristīne Pokratniece.

Latvīšu folklorys kruotuvis digitalais arhivs garamantas.lv ir daīmams sevkuram tradicionaluos kulturys interesentam nu 2014. goda beigu. Arhiva veiduotuoji pīduovoj vareibu īsapazeit ar LFK sakruotū boguotū folklorys materialu, kai ari aicynoj kotru lītuotuoju tolkā arhiva satura pylnveiduošonā.

Latvīšu folklorys kruotuve ir Latvejā leluokais folklorys vuokšonys, izpietis i uzglobuošonys centrs, kurā atrūnams ap 3 milj. folklorys vīneibu – rūkroksti, zeimiejumi, fotomateriali, skaņu i video īroksti. Tī dokumentej myusu tautys dzeivisveidu, viesturi i volūdu vairuoku godu symtu garumā, ļaun īpazeit dažaidu socialu sluoņu i nūvodu folkloru, kū pīrakstejuši, apkūpuojuši i LFK īsyutejuši i nūvodpietnīki – entuziasti, i cytys Latvejis kulturviesturē nūzeimeigys personys, kai ari Latvejis školys, augstškolys i cytys organizacejis. Bez latvīšu folklorys vuokumim LFK atsarūn ari cytu Latvejā dzeivojūšu tautu (lībīšu, krīvu, vuocu, ebreju, igauņu, čyguonu i bolkrīvu) folklorys kolekcejis.

LFK digitalais arhivs ir daīmams bez moksys. Itūšaļt digitalizāti jau apmāram 490440 manuskriptu faili, ap 14 000 ilustraceju (kartenis i zeimiejumi), kai ari ap 5000 viesturisku audio failu – tautysdzīsmis, ziņgis, nūstuosti i.c. Arhiva specialistu izstruoduotuo metadatu sistema, materialu kuortuojuma pryncipi i teksta atlasis reiki nūdrūšynoj tuo dreizu i ārtu izmontuošonu. Materialus var meklēt piec vairuoku atlasis kritereju – pogosta, žanra, volūdys, organizacejis, personys i.c.

23. oktobrī seminarā garamantas.lv redaktoris – Elvīra Žvarte i Kristīne Pokratniece īpazeistynuos interesentus ar LFK digitaluo arhiva izmontuošonys vareibom, kai ari pastuosteis i paruodeis, kaidi Rēzeknis pusis materiali atrūnami Latvīšu folklorys kruotuvē.