Latvejā populari muziki radejuši jaunu festivala “Upītes Uobeļduorzs” himnys verseju

Portals lakuga.lv 10. Oktobris, 2017. gods Comments Off on Latvejā populari muziki radejuši jaunu festivala “Upītes Uobeļduorzs” himnys verseju

16. septembrī jau sešpadsmytū reizi Vileks nūvoda Upeitē nūtyka vacuokais latgalīšu muzykys i dzejis festivals pasaulī – “Upītes Uobeļduorzs”, bet niu, pīsadolūt Latvejā popularim muzikim, topuse jauna festivala himnys verseja, informej Namaterialuos kulturys montuojuma centra “Upīte” direktors Andris Slišāns.

“Upītes Uobeļduorzs” himnys vuordu autors ir festivala aizsuociejs, latgalīšu literats, nūvodpietnīks, folklorists Ontons Slišāns, bet muzyku sarakstejs dzīsminīks Uldis Frīdrihsons. Dzīsmis “Upītes Uobeļduorzs” jaunū variantu aranžiejs latgalīšu muzikis, grupys “Dabasu Durovys” liders Arņs Slobožanins. Jaunajā dzīsmis versejis īrokstā pīsadola vairuoki Latvejā populari muziki – grupys “Astro’n’out” lidere Muora Upmane-Holšteine, grupys “Prāta Vētra” solists Renārs Kaupers, grupys “Gain Fast” liders Kaspars Zlidnis, grupys “Bez PVN” daleibnīki Guntis Rasims i Kristaps Rasims, grupys “Borowa MC” soliste, dzīduotuoja Guntra Kuzmina-Jukna, kai ari pats aranžejis autors Arņs Slobožanins. Dzīsmis video verseju salics Artūrs Slišāns, kurs Latvejā zynoms kai daudzu popularu dzīšmu remiksu autors.

Festivals “Upītes Uobeļduorzs” namaineigi kotru godu trešajā septembra svātdīnē puļcej latgalīšu muzikus i grupys, īpazeistynoj ar jaunim vuordim latgalīšu kulturā i aicynoj gostūs kotru interesentu. Ituo goda festivalā Upeitē sasatyka muziki i grupys: “Dabasu Durovys”, “Piparmētra”, “Metrs”, “Dvinskas muzikanti”, “Unknown Artist”, folklorys kūpys “Upīte” i “Rekavas dzintars”, Vinsents Kūkojs i grupa “Trikmīņs”, Dainis Adijāns, Kate i Doms i cyti. Gondreiž vysi muziki, kurī pīsadola jaunuos festivala himnys versejā, Upeitē ir uzastuojuši kaidā nu festivala nūtikšonys godim, itūgod tys beja Renārs Kaupers, kurs prīcēja kai ar grupys “Prāta Vētra” dzīsmem, tai kūpā ar folklorys kūpys “Upīte” jaunīšim izpiļdeja fonda “Viegli” skaņdorbus, bet ar Arni Slobožaninu i akteri Girtu Liuziniku – dzīduoja ari dzīsmis latgaliski.

Jau viesteits, ka festivala suokums meklejams 2002. godā, kurū tuo idejis autors Ontons Slišāns radeja kai sovpateigu dzejis dīnom veļteitu festivalu, kab popularizātu i saglobuotu latgalīšu volūdu. Itūšaļt festivala organiziešonu turpynoj Ontona dāls Andris Slišāns, saglobojūt festivalu kai kasgadeju latgalīšu sasatikšonys reizi i turpynojūt tradiceju, ka kotram muokslinīkam vysmoz vīna dzīsme voi dzejūļs juoizpylda latgaliski, nu puorsvorā festivalā latgalīšu volūda skaņ symtproceņteigi.

Cyts, jau septeņpadsmytais, festivals “Upītes Uobeļduorzs” nūtiks 2018. gada 15. septembrī, sasatikšonys vītai palīkūt namaineigai – Vileks nūvoda Upeitis tautys noms.

Komentari slāgti.