Latgalīšu kulturys ziņu portals lakuga.lv

Rēzeknē nūtiks eipašais “Dzirdi Balsis ar Kārli Kazāku” koncerts

Rēzeknē nūtiks eipašais “Dzirdi Balsis ar Kārli Kazāku” koncerts

Sastdiņ, 14. oktobrī, Latgolys viestnīceibā GORS izskanēs TV projekta “Dzirdi Balsis ar Kārli Kazāku” eipašais koncerts, kurā ar klauseituojim sasatiks na viņ pats Kārlis Kazāks i vysaiž skanūšuos Latvejis izlūksnis, nu ari cylvāki, pi kurūs gasteja raidejuma filmiešonys komanda, informej Latgolys viestnīceibys GORS puorstuove Edeite Husare.

Nu 7. septembra catūrtdīnēs LTV1 var vērtīs raidejumu cyklu “Dzirdi Balsis ar Kārli Kazāku”, kurā muzikis Kārlis Kazāks brauc iz vysaidom Latvejis vītom, kab radeitu dzīsmis vītejā izlūksnē, pošam pīdzeivojūt i cytim ruodūt latvīšu volūdys boguoteibu. Muzikis gastejs i dzīsmis radeitys Zīmeļlatgolā (Baļtinovā), Sielejā (Dignuojā), Lejiskūrzemē (Rucavā), Zīmeļvydzemē (Salacā), Dīnvydlatgolā (Ondrupinē), Austrumkūrzemē (Talsūs) i Malēnijā (Alūksnē, Lejiscīmā). Televizejis raidejumu veidoj “Epatastudio”.

Kab raidejuma laikā radeituos dzīsmis sasatyktu ar klauseituoju ari kluotīnē, Kārlis i juo muziku grupa 14. oktobrī 19.00 aicynoj iz koncertu Latgolys viestnīceibā GORS. Koncertā pīsadaleis ari Gints Sola, Kaspars Tobis, Māris Bīmanis, Jurs Kroičs, Maija Ušča i Anete Kozlovska, programā izskanēs i raidejuma laikā radeituos dzīsmis, i jau zynomī Kazāka skaņdorbi. Pyrma Rēzeknis nūtikšonys koncertprograma “Dzirdi Balsis ar Kārli Kazāku” skanējuse tik 23. septembrī Latvejis Nacionaluos bibliotekys Zīdūņa zalā Reigā, bet cytys reizis vairs nateik planavuotys, partū koncerta radūšuo komanda pastreipoj, ka paspēt sasatikt kluotīnē ar “Dzirdi Balsis ar Kārli Kazāku” var tik Rēzeknē.

Koč i sovys dzymtys saknēs Kārlis Kazāks latgalīšus nav atrads, tok Latgola pādejūs godu laikā muziki ir sirsneigai iemīļuojuse (nasašaubūt par obpusieju patikšonu) – Kārlis ir na viņ pīsadalejs vysaidūs latgaliskūs koncertūs i festivalūs, dzīduojs i radejs dzīsmis latgaliski, nu ari sajiems Latgalīšu kulturys goda bolvu “Boņuks 2014” par latgalīšu volūdys populariziešonu. Ituo gods janvarī nūtyka ari pyrmais muzika solo koncerts Latgolys viestnīceibā GORS.

Beleti iz sastdiņ gaidamū koncertu Rēzeknē atrūnami Latgolys viestnīceibys GORS i “Biļešu Paradīze” kasēs, kai ari latgalesgors.lv.  Beletu cena – 15 eiro, GORS Kulturys viestnīku programys dalinīkim 10 % atlaide.

Nūtikšonu kalendars

Nov
19
Pyr
20:00 Muzykys izlasis “Dvieselis steig... @ restoranā “Plaza” Daugovpilī
Muzykys izlasis “Dvieselis steig... @ restoranā “Plaza” Daugovpilī
Nov 19 @ 20:00 – 21:00
Muzykys izlasis “Dvieselis steigys” prezentaceja @ restoranā “Plaza” Daugovpilī | Daugavpils | Latvia
Gatavejūtīs Latvejis symtgadis svātkim, muzykaluo apvīneiba “Teksasys Latgalīši” i muzike Aija Nagle-Īzāka nu ASV īrakstejuši albumu “Dvieselis steigys”, kurymā apkūpuotys labi zynomys latgalīšu i latvīšu melodejis jaunā interpretacejā.Drukavuot
Nov
20
Ūtr
19:00 Muzykys izlasis “Dvieselis steig... @ “Kino māja"
Muzykys izlasis “Dvieselis steig... @ “Kino māja"
Nov 20 @ 19:00
Muzykys izlasis “Dvieselis steigys” prezentaceja @ “Kino māja" | Riga | Latvia
Gatavejūtīs Latvejis symtgadis svātkim, muzykaluo apvīneiba “Teksasys Latgalīši” i muzike Aija Nagle-Īzāka nu ASV īrakstejuši albumu “Dvieselis steigys”, kurymā apkūpuotys labi zynomys latgalīšu i latvīšu melodejis jaunā interpretacejā.Drukavuot