Arendolis muižā nūtiks ceļuojūšais festivals “Vadātājs”

LaKuGa 12. Oktobris, 2017. gods 0

Legendu naktī, 28. oktobrī, Arendolis muižā nūsaslēgs ceļuojūšuo festivala “Vadātājs” 2017. goda sezona, informej festivala organizatori. Festivala programā – etižu teatris “Nerten”, multiinstrumentalists Oskars Jansons ar grupu “Jūk”,  indī muzykys grupa “Sigma”, kai ari Artūrs Punte i Semjons Hanins nu tekstgrupys “Orbīta”. Īīšona festivalā bez moksys, suokums – 18.00.

Arendolis muiža, īskauta symtgadeigā parkā, atsarūn gleznainā vītā Dubnys upis īlūkā. Muiža ir vīna nu arhitektoniski interesantuokuom muižom Latgolā, kas jaunūs laiku napuorbyuvāta sasaglobuojuse da myusu dīnu i ar grezneibu i sovpateibu izaceļ Latgolys muižu arhitekturā. Arendolis muižu kūp, veidoj i ar viesturiskuom metodem restaurej muižys īpašnīks Arvids Turlajs.

“Vadātājs” iz Arendolis muižu eipaši aicynoj vysus festivala draugus i interesentus, partū ka ar sezonys nūslāgumu festivals pīdzeivuos ari konceptualys puormainis. Etižu teatra “Nerten” dalinīki Tuoms Treibergs i Svens Kuzmins īpazeistynuos ar vēļ naradzātim eisstuostim, multiinstrumentalists Oskars Jansons, kurs uzastuoj i kai solomuokslinīks, i kūpā ar grupu “Jūk” (tamā bez Oskara muižys koncertā muzicēs ari Edgars Šubrovskis, Dina Skreitule i Raitis Viļumovs), itūšaļt gatavej catūrtū studejis albumu. Pi jauna albuma īroksta, kas gaidams 2018. goda suokuos, struodoj ari indī muzykys grupa “Sigma”. Tekstgrupa “Orbīta” ir Latvejis krīvu dzejnīku, fotografu, muziku i multimedeju muokslinīku apvīneiba, kū festivalā puorstuovēs div prīšknasumi – Semjons Hanins sovu dzeju izpiļdeis kūpā ar kontrabasistu Stanislavu Judinu, sovukuort Artūrs Punte skaiteis dzeju poša radeitu skaņu pavadejumā, padorūt ari dzejnīka bolsu par muzykys instrumentu. Obejus prīšknasumus papyldynuos ari vizualys projekcejis.

Ceļuojūšais muzykys i muokslys festivals “Vadātājs” ir draudzeigs i saimem ar bārnim, i jaunīšim. Īīšona pasuokumā ir bez moksys, i festivals gaida sevkuru, kuram ir interese par myusu dīnu kulturys aktualitatem.