Emīls Bauga debitej muzykā ar dzīsmi “Stuosts”

Emīls Bauga debitej muzykā ar dzīsmi “Stuosts”

Jaunais muzikis Emīls Bauga pīduovoj klauseituojim sovu pyrmū dzīsmi “Stuosts”.

Emīls stuosta, ka vysu dzeivi ir grūziejīs apleik muzykai, pīsadalejs konkursūs i vysaidūs cytūs pasuokumūs i vīns pats, i ar grupom. Latgolys muzykys paziniejim, īspiejams, dzierdāts byus grupys “The Weird Wednesdays” vuords, ar kuru kūpā Emīls ir sajiems vairuokus pyrmuos pakuopis diplomus valsts leimiņa konkursūs, muziciejs vysaidūs festivalūs i koncertūs, tok jaunajam muzikam da šam nav eisti saguojs radeit koč kū sovu. “Asmu daudz rakstejs vuordus i muzyku, bet nikod naasmu daveds da gola, da plašuokys auditorejis, kū ari ceru izdareit taišni ar itū dzīsmi,” jis soka.

Dzīsmis “Stuosts” pamatu Emīls sarakstejs jau seņ, tok da gola pabeidzs tik itamā vosorā. “Dzīsme ir par lāmumim, kū mes izdoram kotru dīnu, tūs izraiseituom sekom i, prūtams, tū, kai mes iz tuom reagejom. Byuteibā itūšaļt, publicejūt sovu pyrmū dzīsmi, ceņšūs jimt vārā poša raksteitūs vuordus, ka “ir atļauts kliudētīs, meklejūt dūmu, bet nadreikst spieļuot upera lūmu”, nasabeit nu klaidys i beidzūt izdareit guojīni. Dzīsmei deļ manis ir div nūzeimis. Pyrmkuort, itei dzīsme ir pīruodejums tam, ka es spieju eistynuot sovys idejis i radeit koč kū, kas prīcej gon mani pošu, gon, cerams, i tūs, kas dzīsmi klausēsīs. Ūtrkuort, tys ir suokums deļ manis kai muokslinīka, pyrmais nūītais pūsms nu vysa garuo ceļa, kas vēļ prīškā,” par dzīsmi soka Emīls Bauga.

“Paļdis juosoka Arņam Slobožaninam, kurs na viņ pīsadaleja īrokstā, bet ari paleidzēja sasajimt. Lelu paļdis asu poruodā ari Guntim Rasimam, jis dzīsmis tapšonys procesā napīsadaleja, bet vysod ir atbaļstiejs i devs padūmu, kod tys vajadzeigs. Navar aizmierst i vysus foršūs, kas paleidzēja video i īroksta tapšonā,” sovim paleigim i atbaļsteituojim pasasoka Emīls.

Dzīsmis vuordu i muzykys autors: Emīls Bauga

Īrokstā pīsadaleja:
Arņs Slobožanins – gitara i bolss
Emīls Bauga – gitara, bolss i bungys
David Whitlock – gitara
Zurabi Ivanāns – bass

Video i karteņu autore: Viola Lapa

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]