Latgolys Centralajā bibliotekā apsaverama Valda Grebeža keramikys izstuode

LaKuGa 31. Oktobris, 2017. gods Comments Off on Latgolys Centralajā bibliotekā apsaverama Valda Grebeža keramikys izstuode

3. novembrī 14.00 Latgolys Centraluos bibliotekys (LCB) periodikys sektorā tiks atkluota amatnīka, keramika Valda Grebeža rodūšūs dorbu izstuode “Grācijas”, informej bibliotekys puorstuove Jelena Jevsejeva. Ekspoziceju veidoj dorbi seikplastikys i skulpturys tehnikuos, ar kurūs paleidzeibu meistars īmyužynuojs kusteibys dažaidūs tālūs i materialūs.

Valdis Grebežs ir Špogu Muzykys i muokslys školys direktora vītnīks vuiceibu dorbā i vizuali plastiskuos muokslys školuotuojs. Jis ir omotu meistars keramikā, nu tikpat profesionalai veidoj muokslys dorbus nu kūka, gāzbetona, stykla i akmiņa. Meistara dorbi atsarūn personeigajuos kolekcejuos vaira kai 15 vaļstīs. Paraleli pedagogiskajai darbeibai Valdis Grebežs aktivai pīsadola projektā “Latgolys tematiskī cīmi”, i ituo projekta ītvorūs dorbojās kai Vyšku amatnīku cīma koordinators.

Meistars ir pīsadalejs vairuokuos storptautyskuos amatnīku i Latgolys uzjiemiejdarbeibys izstuodēs, komercizstuodē Moskovā 2004. godā, izstuodēs Reigys piļsātys svātkūs, ari Rēzeknē. 2016. godā tyka atkluotys personalizstuodis Rēzeknis nūvoda Maltys muzejā i Preiļu centralajā bibliotekā. 2016. godā jis apbolvuots ar Daugovpiļs nūvoda dūmis Atzineibys rokstu.

Izstuode “Grācijas” apsaverama LCB Periodikys sektorā nu 1. da 31. novembra.

Komentari slāgti.