Grupa “Bez PVN” 14 stuņdis fiļmej napylnu četru minutu garu video

LaKuGa 6. Novembris, 2017. gods Comments Off on Grupa “Bez PVN” 14 stuņdis fiļmej napylnu četru minutu garu video

Piec puors godu klusiešonys, ituo goda novembris suocīs ar latgalīšu muzykys grupys “Bez PVN” jaunuokuo video dzīsmei “Golds iz ustobys” atruodeišonu.

Video ir uzjimts Kuorsovys kulturys nomā – vītā, kur 2003. godā latgalīšu muzykys grupa “Bez PVN” suoce sovu darbeibu. Fiļmiešonys process vīnys dīnnakts laikā aizjiems 14 stuņdis, kas grupai ir jauns fiļmiešonys rekords. Video idejis beja gona apjūmeigys i sarežgeitys. Lai tuos realizātu, beja vajadzeigs gona daudzi dorba, laika i pacīteibys, ar kū vysa fiļmiešonys komanda tyka golā.

Grupa, kas ir video idejis autori, soka: “Dzīsmis videoklips ir veļtejums myusu bierneibai i lītom, kas koč kod bejušys cīši svareigys, bet niu jau damierstys. Ir juoatguodoj, ka ari tys, kas ar kotru nu myusu nūteikt tagad, koč kod byus tik paguotne. Var byut, ka arī nūlykta iz ustobys…”

Intrigai grupa dasoka, ka itys nav vīneigais video, kū “Bez PVN” planavoj atruodeit vēļ itymā godā.

Grupa prīcojās, ka videoklipu jau nūviertiejuši na tik viņ atbaļsteituoji, bet ari cyti muziki. Sovā Facebook kontā grupys “The Sound Poets” liders Juoņs Aišpurs dalejuos ar video i dasaceja: “Jaudīga, skaista, patiesa un uzrunājoša dziesma! Bez PVN noņemu cepuri Jūsu priekšā! Malači!!! Un šis ir stāsts par to, ka nav no svara kādā valodā Tu dziedi – latviešu, latgaļu, poļu, angļu vai kādā, ko zin vien pāris cilvēki uz zemeslodes un Tu nesaproti ne vārda. Mūzika runā no sirds uz sirdi! Vīri, mana cieņa Jums!”

Par video biļdi pasaryupēja “Studija 3KM” – Juoņs i Sandra Rimicāni.
Dzīsmis “Golds iz ustobys” teksta i muzykys autors ir Guntis Rasims.
Dzīsmis aranžiejumu veiduojuse vysa “Bez PVN” grupa.
Īroksts veikts studejā “REIGA”, mix – Krišjānis Geidāns, masters – Kaspars Ansons.

Grupa “Bez PVN” ir:
Kristaps Rasims – bolss, elektriskuo gitara
Guntis Rasims – bolss, akustiskuo gitara
Jurs Vucāns – bolss, metalofons, cyti instrumenti
Valdis Vucāns – bass
Normans Bārbals – bungys

Komentari slāgti.