Kruoslovā byus apsaverama tekstilmuokslineicys Ingunys Levšys izstuode

LaKuGa 8. Novembris, 2017. gods 0

No 10. novembra da 21. decembra Kruoslovys kulturys nomā byus apsaverama tekstilmuokslineicys, kruoslavītis Ingunys Levšys dorbu izstuode “Otrpus”, viestej informaceja Kruoslovys nūvoda sātyslopā.

Izstuodis “Otrpus” centrā ir tāli, vide i motivi, kas muokslineicai ruodīs nūzeimeigi juos personeibys veiduotuoji, par pīmāru, vairuokys reizis dažaidūs kontekstūs teik variāts mežs, kūku zoru mudžeklis, kas simetriski izkuortuots kai totema stobs, taipat ari silueti, kas ir īausti storp taidim dobys elementim kai sieņs, jiura i iudiņa zīdiešona. Ingūna Levša struodoj žakarda tehnikā, aužūt digitalūs gobelenus, kas ļaun veiduot komplicātys kompozicejis, atsasaucūt i vaira īkļaunūt tamuos apleicamū realitati.

Muokslineica puorsvorā struodoj ar karteņom, tamuos raportā integrejūt vysaidus elementus, kas atsakuortoj, daži elementi teik kuortuoti kaleidoskopiskuos kompozicejuos. Tai privatuo mitologeja i subjektivisms mejās ar vyspuorynuotim tālim i metaforom.

Ar sovim audaklim Inguna Levša pīsoka jaunu i Latvejis tekstilmuokslā samārā moz izplateitu pīeju, kas lelā mārā bolstuos iz realistisku formu pīlītuojumu i sižetisku konkreteibu. Muokslineica pīduovoj jaunu redzīni iz tekstilmuokslys vareibom, modernūs tehnologeju snīgtuos prīškrūceibys apvīnojūt ar spieju radeit dzili personeigus viestejumus.

Nu 2001. goda muokslineica aktivai pīsadola izstuodēs, ir bejušys devenis personalizstuodis i ap 30 grupu izstuodis i Latvejā, i uorvaļstīs. Izstuodē radzamī dorbi ir radeiti Gimarainšā (Portugale) i Bergenā (Norvegeja).