“Pi myusim Latgolā” par bārnu rūtaļlītom seņuok i niule

LaKuGa 13. Novembris, 2017. gods 0
“Pi myusim Latgolā” par bārnu rūtaļlītom seņuok i niule

Itūreiz raidejumā “Pi myusim Latgolā” Laura Sondore-Strode rauga dazynuot, voi rūtaļlītys var byut myusu kulturys līcineicys i kaidys spēlis bārnim Latgolā taisa myusu dīnuos.

“Vīna nu vysu laiku senejuokuom spēlem ir sviļpaunīks,” dūmūt apsavērt skalinē asušūs sviļpaunīkus, stuosta Latgolys Kulturviesturis muzeja specialiste Inese Ločmele. “Arheologiskī izrokumi līcynoj, ka sviļpaunīkus jau ir taisejuši i spieļuojuši bārni jau 12. i 13. godu symtā. Sviļpaunīki atrosti ari Rēzeknis piļskolnā. Tei ir vīna nu vacuokajom rūtaļlītom, kas atrosta i izmontuota ari Latgolā.”

Ari kūka rūtaļlītys ir vīnys nu vierteiguokajom, praktiskuokajom i vacuokajom. Tuos izgataveit beja iz vysa vīgluok. Latgolā popularuokuo kūka rūtaļlīta nūteikti ir žvūrgzdyns, i tys ir zynoms pat ASV.

Inese Ločmele stuosta, ka bārni, pīsadolūt muzeja senejūs spēļu i rūtaļu programā, iz kaidu šaļti aizmierst par spinerim i cytom myusu dīnu rūtaļlītom.

Sovpus Preiļūs tūp pošu radeitys rūtaļlītys, kas izaver mīleiguok nakai tī poši spineri. Aija Zīmele ir div bārnu muote, kura, auklejūt bārnus, izauklējuse ari sovu biznesa ideju. Jei suokuse rūtaļlītu ražuošonu, atteistūt sovu zeimūlu “Bērnības zeme”.