Restaurāta Bieržu kopu kapleica

Restaurāta Bieržu kopu kapleica

13. novembrī Bolvu nūvoda Bieržpiļs pogostā piec restauracejis svineigi tyka atkluots arhitekturys pīmineklis – Bieržu kopu kapleica, informej pošvaļdeibys puorstuove Iluta Mežule. Rekonstruātū kapleicu īsvieteja Rēzeknis-Aglyunys diecezis veiskups Juoņs Bulis i Bieržu katuoļu draudzis prīsters Oļgerts Misjūns.

Par Bieržu kopu kapleicys atjaunuošonu arhitektoniskuos izpietis grupys sātys lopā Artūrs Lapiņš roksta: “Vaļsts nūzeimis arhitekturys pīmineklis Bieržu kopu kapleica (aizsardzeibys Nr. 2840) pošreizejā vītā atsarūn nu 1920. goda. Kapleicys byuvviesture aizasuoce Zosulūs 1791. godā, kur izcalta Jezus sirds kapela ar ostoņstyura planavuojumu. Izpietē, piec analogejis ar Dubnu, pīļauts, ka kapelai variejuši byut vairuoki frontoni i prīšktelpa. 19.gs. 1. pusē ostoņstyura apjūmam dacalta draudzis daļa, kai ari gaņkys ar četrom kolonom, treisstyurveida frontonu, vāluo klasicisma stilistikai rakstureigom durovom i lūgim. 1920. godā kapleica puorvasta iz Bieržu kopim i veikta tuos rekonstrukceja, pagaisynojūt daļu nu originalūs detaļu. Ar laiku kapleica īgrymuse kopu zemē, na tik izmainūt proporcejis, bet ari maitojūt apakšejūs vaiņuku konstrukcejis.”

Bieržu kapleicys atjaunuošonys dorbi tyka veikti projekta ītvorūs, kuruo laikā tyka padareiti demontātuo kuorma atjaunuošonys dorbi – nasūšūs konstrukceju izbyuve i restauraceja, fasadis restauraceja, atjaunuošona, jumta konstrukceju restauraceja i saguma atjaunuošonys dorbi, kai ari kapleicys interjera restauraceja. Uzsvors arhitekturys atjaunuošonys dorbu laikā tyka lykts iz tradicionalūs materialu i dorba metožu lītuošonu, kab saglobuotu kapleicys autentiskumu.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]