Tiks izdūts Aijis Erinis albums “Par martu, maiju un decembri”

Tiks izdūts Aijis Erinis albums “Par martu, maiju un decembri”

1. decembrī izīs puoragri myužeibā aizguojušuos Aijis Erinis albums “Par martu, maiju un decembri”, kurā byus īkļautys 11 dzīsmis. Albuma kūdulu veidoj Aijis i Valda Metlāna pādejūs treis godu laikā kūpā komponātuos dzīsmis ar Ojāra Vācieša i Klāva Elsberga dzeju, kai ari pošys Aijis tekstim. 

Klauseituojim teik nūdūta ari dzīsme “Taurens” nu gaidomuo albuma:

Albums byus pyrmais izdavumu serejā, kurā paradzāts publicēt Aijis Erinis pādejūs desmit godu laikā radeitū muzykalū daiļradi. Albuma īroksts tyka suokts 2016. godā, bet pabeigts ituo gods novembrī, četrus mienešus piec Aijis pieškuos aizīšonys myužeibā. Albuma īrokstā izmontuoti Aijis Erinis bolsa īroksti.

Īroksta procesā pīsadalejuši zynomuos Latvejis grupuos spielejūši muziki: Valdis Metlāns – gitara, tausteni (“Green Novice”), Normans Bārbals – bungys (“Momend”), Edgars Špengelis – bass (“Pūķa Gars”), Kaspars Tobis – tausteni (“Dzelzs Vilks”),  Armands Varslavāns – gitara (“Laimas Muzykanti”), Sintija Šteinkofa – tausteni (“Laimas Muzykanti”), Linards Eriņš – vokals, pībolsi, akustiskuo gitara (dzīdūšuo Eriņu saime) i Daiga Barkāne – bolss (“Ausmeņa records”). Albumu raksteja, miksēja i māsterēja Kārlis Šteinmanis (“KS Records”).

Aija Eriņa leluoku atpazeistameibu sajāmuse ar uzvaru Latvejis Televizejis reikuotajā šovā “Latvijas Talants 2008”. Jei kūpā ar saimi vairuokys sezonys pīsadalejuse ari LNT šovā “Dziedošās ģimenes”, kai ari ar daudzom popularom dzīsmem izskanējuse Latvejis radejuos. Aija Eriņa i kai solomuokslineica, i kūpā ar dzīdūšū Eriņu saimi sovys muzykaluos karjeris laikā ir snāguse vaira kai 100 koncertu vysā Latvejā.

Print Friendly, PDF & Email