Izdūta Ilmāra Meža gruomota par pavuordem Latgolā

LaKuGa 11. Decembris, 2017. gods Comments Off on Izdūta Ilmāra Meža gruomota par pavuordem Latgolā

Izdūta viesturnīka, geografa i demografa Ilmāra Meža izstruoduotuo vuordineica “Latviešu uzvārdi arhīvu materiālos: Latgale”, viestej informaceja Latvīšu volūdys agenturys sātyslopā.

Vuordineicā atrūnams gondreiž 4000 latgalīšu pavuoržu saroksts, kotrai dūmūt izplateibys raksturuojumu, daudzom ari nūzeimis skaidruojumu. Vēļ gondreiž 1900 reši sastūpamu pavuoržu ir nūsauktys dalykumā.

Gruomotā pīduovuota ari volūdneicys A. Stafeckys pavuoržu materiala lingvistiska analize, geografis O. Kovalevskys izpieteitais par pavuoržu saisteibu ar Latgolys vītvuordim, sovukuort viesturnīks M. Auns raksturuojs pavuoržu pīškieršonys viesturiskū fonu Latgolā.

Gruomotai eipaši sagataveitys 10 pavuoržu izplateibys kartis, kas snādz īskotu Latgolys pavuoržu geografejā i ļaun uzskotami nūsaceit īspiejamuos izceļsmis vītys i īzeimēt izplateibys arealu. Divejūs dalykumūs apkūpuotys Latgolā nalelā skaitā konstatātuos pavuordis i izplateituokuos pavuordis Latgolys pogostūs.

Gruomota “Latviešu uzvārdi arhīvu materiālos: Latgale” ir nūpierkama Latvīšu volūdys agenturā (cena: 21,31 eiro).

Komentari slāgti.