Pagarynuota dasasaceišona Latgalīšu kulturys goda bolvai “Boņuks 2017“

LaKuGa 10. Janvars, 2018. gods Comments Off on Pagarynuota dasasaceišona Latgalīšu kulturys goda bolvai “Boņuks 2017“
Pagarynuota dasasaceišona Latgalīšu kulturys goda bolvai “Boņuks 2017“

Atsasaucūt interesentu lyugumam, pretendentu dasaceišona Latgalīšu kulturys goda bolvai “Boņuks 2017” pagarynuota da svātdīnis vokora, 2018. goda 14. janvara, informej Latgolys viestnīceibys GORS puorstuove Edeite Husare.

Itūgod bolvys “Boņuks 2017” pretendentus var dasaceit 18 nominacejuos par aktivitati i padareitū 2017. godā latgaliskuos kulturys laukā, itūšaļt sajimtys jau 120 dasacejuma anketys. 2018. goda 25. februarī Latgolys viestnīceibys GORS Lelajā zalē bolvys svineigā ceremonejā tiks padūtys jau dasmytū reizi. “Boņuks” ir vīneiguo bolva, kurei eipaši izceļ i gūdynoj sasnāgumus i padareitū latgaliskuos kulturys dzeivē.

Latgalīšu kulturys goda bolvys “Boņuks” mierkis ir veicynuot latgalīšu kulturvidis saglobuošonu i atteisteibu, kai ari apkūpuot i gūdynuot spylgtuokūs i nūzeimeiguokūs sasnāgumus latgalīšu kulturā pārnejuo goda grīzumā. 2018. goda bolvai pretendentu dasacejumi teik pījimti 18 nominacejuos, kas atsatīc iz sabīdryskūs aktivitašu, muzykys i literaturys laukim. Ituo goda suokumā bolvys par padareitū, sasnāgumim voi aktivitati latgalīšu kulturā pārn sajieme Latvejis Radejis Latgolys multimedeju studeja, Preiļu tierdznīceibys centra “Ūga” saiminīki Ingūna i Aigars Zīmeli, dokumentaluo kina “Likteņzeme”, izdavums “Škilbanu sīvas”, dokumentaluo kina “Runātāji”, Rēzeknis Tautys teatra izruode “Pupas”, Sandrys Ūdris i Juoņa Ryučāna romans “Aizlauztais spaits”, grupa “Piparmētra”, projekts “Jezups i Muosys”, apvīneiba “Sovvaļnīks”, latgalīšu kulturys ziņu portals “LaKuGa.lv”, muokslineica Daina Salmiņa, literaturzynuotneica i latgalīšu kulturvidis aktiviste Ilga Šuplinska, tradicionaluos dzīduošonys grupa “Saucējas”, kamerkors “Muklājs”, grupa “Dvinskas muzikanti”, bet par myuža īguļdejumu latgalīšu kulturys populariziešonā tyka gūdynuoti dirigenti i školuotuoji Antonina i Vitolds Milaševiči. 

Aizpiļdeitys dasacejuma anketys bolvai “Boņuks 2017” elektroniskajā formatā, pa pastu voi tīšsaistis dasacejuma veidā (atrūnamys sātyslopā bonuks.lv) Latgolys viestnīceiba GORS gaideis da 2018. gada 14. janvara vokora. Īsnāgtūs dasacejumus izvērtēs latgaliskū kulturvidi voi attīceigū bolvys nūzari puorzynūša žureja sovu sferu profesionaļu sastuovā. 

Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnejā godā padareitū, bet ari latgalīšu kulturys aktivuokūs ļaužu, interesentu i atbaļsteituoju sirsneiga i īdvesmojūša sasatikšona. 2018. goda 25. februarī Latgolys viestnīceibys GORS Lelajā zalē bolvys svineigā ceremonejā tiks padūtys jau dasmytū reizi. Ceremonejā ar prīšknasumim prīcēs Latvejā zynomi latgaliski dzīdūši muziki i apvīneibys – grupa “Bez PVN”, apvīneiba “Latgalīšu reps”, grupa “Unknown Artist”, Guntra Kuzmina i Rēzeknis nūvoda vokaluo studeja “Skonai” i cyti muokslinīki. 

Latgalīšu kulturys goda bolvu “Boņuks” jau pīktū reizi reikoj Latgolys viestnīceiba GORS. Bolvys “Boņuks 2017” nūtikšonu atbolsta Vaļsts kulturkapitala fonda Latgolys kulturys programa ar A/S “Latvijas valsts meži” atbolstu, Rēzeknis piļsātys dūme, Rēzeknis nūvods i Rībeņu nūvods. Informativī atbaļsteituoji: žurnals “Ir”, Latgalīšu kulturys gazeta lakuga.lv, Latgolys radeja i Latvejis Radejis Latgolys studeja. 

Bolvu padūšonys ceremoneju kluotīnē varēs pīdzeivuot kotrys grybātuojs. Beleti nūpierkami Latgolys viestnīceibys GORS i “Biļešu Paradīze” beletu sistemuos. Beletu cena 5,00 €. 

Komentari slāgti.