Rēzeknē atvērs gruomotu “Latviešu uzvārdi arhīvu materiālos: Latgale”

Portals lakuga.lv 7. Februars, 2018. gods Comments Off on Rēzeknē atvērs gruomotu “Latviešu uzvārdi arhīvu materiālos: Latgale”

Latgolys Kultrviesturis muzejā Rēzeknē 20. februarī 15:00 stuņdēs prezentēs viesturnīka, geografa i demografa Ilmāra Meža gruomotu “Latviešu uzvārdi arhīvu materiālos: Latgale”.

Vuordineicā atrūnams gondreiž 4000 latgalīšu pavuoržu saroksts, kotrai dūmūt izplateibys raksturuojumu, daudzom ari nūzeimis skaidruojumu. Vēļ gondreiž 1900 reši sastūpamu pavuoržu ir nūsauktys dalykumā.

Gruomotā pīduovuota ari volūdneicys A. Stafeckys pavuoržu materiala lingvistiska analize, geografis O. Kovalevskys izpieteitais par pavuoržu saisteibu ar Latgolys vītvuordim, sovukuort viesturnīks M. Auns raksturuojs pavuoržu pīškieršonys viesturiskū fonu Latgolā.

Gruomotai eipaši sagataveitys 10 pavuoržu izplateibys kartis, kas snādz īskotu Latgolys pavuoržu geografejā i ļaun uzskotami nūsaceit īspiejamuos izceļsmis vītys i īzeimēt izplateibys arealu. Divejūs dalykumūs apkūpuotys Latgolā nalelā skaitā konstatātuos pavuordis i izplateituokuos pavuordis Latgolys pogostūs.

I. Mežs par latgalīšu pavuordem stuosta raidejumā “Kolnasāta”.

 

Portala lakuga.lv arhivā daeinami I. Meža roksti par latgalīšu pavuordem Baltinovys, Škilbanu i Brīžucīma pogostūs i Aulejis i Izvolta pogostūs.

Komentari slāgti.