Vīstura Kairiša kinā “Piļsāta pi upis” golvonū varūni tāluos Dāvis Suharevskis

Vīstura Kairiša kinā “Piļsāta pi upis” golvonū varūni tāluos Dāvis Suharevskis

Pošuos februara beiguos uzsuoks zīmys ainu fiļmiešonu Vīstura Kairiša jaunajai kinai “Piļsāta pi upis”, kas byus latgalīšu volūdā. Pyrmūs kinys kadrus uzjims Latgolā – Kruoslovā, Ludzā i Rēzeknē. Kinys golvonuo varūņa Anša lūmai apstyprynuots divdesmit četrus godus vacais Dāvis Suharevskis nu Gaigalovys.

Dāvis akteru atlasē vysus puorsteidze ar sovu osū pruotu, humora izjiutu i vitalitati. Jaunais akters Dāvis studej kīmeju, spielej improvizacejis teatrī “Ārprāts” i dzīd folklorys kūpā “Ceidari”.

Kinys scenareja pamatā ir Gunara Janovska romans ar taidu pošu nūsaukumu. Kinys golvonajam varūņam Anšam ir navaineiga profeseja – daiļkruosuotuojs. Jis ir pīpraseits pi vysu režimu – autoritarajā pyrmskara Latvejā, pi komunistu i nacistu. Bet juo sirdi i dvēseli navar īgiut nivīns nu tūs.

Golvonuos sīvīšu lūmys atveiduos Latvejis Nacionaluo teatra aktrise Agnese Cīrule, kas spielej ari golvonū lūmu V. Kairiša izruodē “Salome”, i jaunuokuos paaudzis aktrise nu Čehejis Brigita Cmutova. Kinā fiļmēsīs ari pīredzis bogoti akteri – Gundars Āboliņš i legendarais lītuvīšu akters Jozs Budraitis.

Par izvālātajom fiļmiešonys vītom režisors V. Kairišs soka: “Latgola ir sovdabeiga i vēļ naizpieteita zeme, tuos atškireiguo viesture, volūda i leidz ar tū ari multikulturaluo atteisteiba bejuse sovaižuoka, nakai puorejai Latvejai. Tys vyss roda Latgolys naatkuortojamū vitalitatis koloritu, i kinys autoru ambicejis ir puorceļt itū spāku iz kinuekrana.”

Kinys “Piļsātu pi upis” fiļmiešona nūtiks 2018. godā, planavuots, ka kina iz ekranim pasaruodeis 2019. goda nūgalē.