“Boņuks 2017″: lakuga.lv skaiteituoju bolsuojuma rezultati

“Boņuks 2017″: lakuga.lv skaiteituoju bolsuojuma rezultati

Svātdiņ, 25. februarī, dasmytū reizi padūs Latgalīšu kulturys goda bolvu “Boņuks”. Bolvai izvirzeitūs pretendentus 17 nominacejuos sabīdreibys i kulturys, muzykys i literaturys sadaļuos nūsaceja žureja. Nu kam žureja byus daškeiruse Boņukus par padareitū 2017. godā, byus zynoms tikai svātdiņ. Sovpus lakuga.lv aicynuoje portala skaiteituojus pīsadaleit aptaujā i nūbolsuot par sovu favoritu kotrā nu nominaceju.

Portala skaiteituoji par goda cylvāku pārn atzynušs režisoru i latgalīšu kulturys aktivistu Vīsturu Kairišu. Vysvaira bolsu kai goda nūtikšona sajiems 4. pasauļa latgalīšu saīts “Latgolys symtgadis kongress”. Latvejis Radejis raidejums “Latgolys stuņde” (LR1 regionalais lūgs) lakuga.lv skaiteituoju īskotūs byutu peļnejs Boņuku par latgalīšu volūdys populariziešonu. Par goda amatnīku/saiminīku bolsuotuoji atzynušs audieju Anneli Slišāni ar projektu “#100dečiLatvijai”. Nominacejā “Goda snāgums vizualajā muokslā” ar nalelu bolsu puorsvoru uzvar muokslineica Ieva Jurjāne ar gruomotu “Kačeiša patmalis”. Par goda snāgumu skotivis muokslā i lobuokū snāgumu akademiskajā muzykā portala skaiteituoji atzynušs koncertizruodi rokstim i skaņai “Latgales gredzens”, sovpus par goda snāgumu audiovizualajā muokslā Boņuku daškiertu LTV1 Latgolys kongresa symtgadei veļteitajam viesturiskajam raidejumu cyklam “Trešā zvaigzne. Sākotne. Personība”, par latgalīšu kulturys populariziešonu Latvejā i pasaulī – TV raidejumu cyklam “Sajūti Latgali”.

Par lobuokū snāgumu pop/rock muzykā 2017. godā aptaujis dalinīki atzynušs projektu “100gadis bolsi” ar albumu “Celīs, bruoļ”, tautys muzykā – postfolklorys grupu “Rikši” ar koncertdarbeibu i jaunom dzīsmem. Aptaujis dalinīki divus Boņukus daškiertu apvīneibai “Latgalīšu Reps” – par lobuokū snāgumu alternativajā muzykā i kai goda debejai muzykā. Vysvaira simpateju kai lobuokais muzykys video izapeļnejs “Bez PVN” video klips dzīsmei “Golds iz ustobys”. Vysvaira bolsu nominacejā “Lobuokais snāgums šlagermuzykā” atdūts par grupu “Galaktika”.

Aptaujis dalinīki pārn par lobuokū snāgumu literaturā atzynušs Raibuo dzejis kruojumu “Pistacejis”. Vīnuodu bolsu skaitu nominacejā “Lobuokais izdavums/gruomota” īgivuse gruomota “Gostūs pi Boņuka. Stuosti bārnim par Latgolu” (autoris I. Šuplinska, L. Rundāne, A. Andrejeva) i Ilmāra Meža sastuodeituo gruomota “Latviešu uzvārdi arhīvu materiālos: Latgale”.

Kai jau īprīkš ziņuots, Latgalīšu kulturys goda bolvu “Boņuks 2017” par myuža īguļdejumu sajims Vuocejā dzeivojūšais dzejnīks, publicists i redaktors, filozofs, prozaikis, literaturkritikis, pedagogs, muokslys zynuotnīks i sabīdryskais darbinīks Aļberts Spuogis i volūdneica, filologejis doktore, školuotuoja i sabīdriskuo darbineica Lideja Leikuma.

“Boņuks 2017” padūšonys ceremonejai tīšraidē leidza varēs sekuot lītuotnē LMT Straume.

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]