Daugovpiļs nūvoda Leiksnā 2018.goda 14. i 15. julī jau septeitū reizi nūtiks leluokais jaunuos latgalīšu muzykys festivals „Muzykys Skrytuļs‟, aicynojūt muzykantus, kuri vysaidūs žanrūs roda dzīsmis latgaliski.

Festivala sastdīnis koncertūs uzastuos latgalīšu jaunuos grupys i byus vareiba baudeit jau atpazeistamu grupu muziciešonu. Svātdīn Leiksnys Vyssvātuos Jezus Sirds Rūmys katuoļu bazneicā nūtiks gareiguos muzykys koncerts.

Pasuokuma organizatori aicynoj muzykantus leidz 20. martam pīsasaceit daleibai festivalā, kai ari izsludynoj konkursu iz breivpruoteigūs paleigu vītom. Muziki sovu daleibu var pīteikt www.surveymonkey.com/r/5H7P3QV, breivpruoteigī www.surveymonkey.com/r/5B5V375. Festivala jaunumim var sekuot leidza socialajūs teiklūs, kai ari festivala satys lopā skrytuls.liksna.lv.

Jaunuos latgalīšu muzykys festivals „Muzykys Skrytuļs‟ pyrmū reizi nūtyka 2005. godā ar mierki popularizēt latgaliskū identitati i sekmēt jaunu dzīšmu radeišonu latgaliski. Festivals vysim apmaklātuojim ir bez moksys. Festivalu tradicionali reikoj Daugovpiļs nūvoda Kulturys puorvaļde, Leiksnys pogosta puorvaļde i festivala iniciatoru grupa.