Jauns vuiceibu leidzeklis latgalīšu volūdys apgivei školuos

LaKuGa 19. Marts, 2018. gods Comments Off on Jauns vuiceibu leidzeklis latgalīšu volūdys apgivei školuos

Latgalīšu volūdys, literaturys i kulturviesturis školuotuoju asociaceja izveiduojuse elektroniskūs vuiceibu leidzekļu komplektu “Olūteņš” latgalīšu rokstu volūdā 4. klasis školānim. Komplektā ītylpst vuiceibu leidzeklis školānim, skaidrojūšuo vuordineica, dorba lopys, kai ari metodiskī īsacejumi školuotuojim i puorbaudis dorbi. Vuiceibu leidzeklis sagataveits par vaļsts budžeta leidzeklim, tys bezmoksys pīejams elektroniskā formatā.

Vuiceibu leidzeklis “Olūteņš” ir pyrmais dorbs, kas izmontojams kompleksai latgalīšu rokstu volūdys i nūvodvuiceibys apgivei. Itys vuiceibu materials izstruoduots, eistynojūt Vaļsts volūdys lykuma 3. panta 4. daļu “Valsts nodrošina latgaliešu rakstu valodas kā vēsturiska latviešu valodas paveida saglabāšanu, aizsardzību un attīstību”. Vuiceibu leidzeklis roda vareibu školānim na tikai apgiut latgalīšu rokstu volūdu, bet ari piļneiguok īpazeit sovu dzymtū vītu, nūvodu, Latgolu Latvejis kontekstā, veidojūt padzilinuotuos vuiceišonuos pīredzi, uzsver vīna nu vuiceibu leidzekļa izstruoduotuojom, Latgalīšu volūdys, literaturys i kulturviesturis školuotuoju asociacejis vadeituoja Veronika Dundure. Pi vuiceibu leidzekļa sagataveišonuos struoduojuse ari Lideja Leikuma i Anna Vulāne.

Elektroniskuo vuiceibu leidzekļa “Olūteņš” saturs strukturāts tematiski veiduotuos nūdaļuos tai, kab vuiceibu saturu varātu eistynuot 70 stuņdēs. Izstruodojūt vuiceibu saturu, jimts vārā, ka suokumškolā školāni jau ir apgivušs gon latvīšu literaruos volūdys, gon latgalīšu rokstu volūdys alfabetu i skaiteišonys i raksteišonys pamatus.

Faili lejupluodiešonai PDF formatā

Olūteņš. Latgalīšu rokstu volūda 4. klasei

Olūteņš. Latgalīšu rokstu volūda 4. klasei. Metodiskī īsacejumi

Latgalīšu volūdys apgivei školuos ir pīejama ari bezmoksys digitaluo latgalīšu ābece “Skreineite”.

Komentari slāgti.