Ar vaļsts atbolstu uzjims dokumentaluos kinys par Latgolu

LaKuGa 9. Apreļs, 2018. gods Comments Off on Ar vaļsts atbolstu uzjims dokumentaluos kinys par Latgolu

Nūsasliedzs Nacionaluo Kino centra izsludynuotais 2018. goda jaunu kinu ražuošonys konkurss. Vaļsts atbolstu kūpumā sajāmušs 12 kinys, divejis nu tom stuosteis par Latgolu.

Kinu ražuošonys projektu konkurss ir goda leluokuo nūtikšona Latvejis kinu nūzaris finansiejuma apritē, golvonais starta punkts jaunu kinu uzjimšonuos suokumam. Konkursā atbolsta pilmetražys spielkinys i vysu garumu animacejis i dokumentalūs kinu ražuošonu ci ražuošonys pabeigšonu. Vaļsts atbolstu sajāmušs 12 kinys – divys spielkinys, treis animacejis kinys i septenis dokumentaluos kinys. Dokumentaluos kinys “Evalds” i “Pirmais tilts” stuosteis par Latgolu.

“Evalds” 34 175 eiro kinys ražuošonys 1. pūsmam
(68 min, scenareja autors, režisors i producents Renārs Vimba, operators Valdis Celmiņš, komponists Ēriks Ešenvalds, montažys režisore Linda Olte, studeja “Corax Film Studio”)

Pūdnīks Evalds Vasilevskis sovā orūdā ir jau 40 godus, vīns nu nadaudzajim, kas pūdus apdadzynoj sviepejamā tehnikā i muolu rūk pots. Ieva ir juo muocekle, kas jau vairuokus godus dzeivuojuse vīnu dzeivi ar meistaru, bet niu ir gotova potstuoveigi kurynuot sovu pyrmū cepli i pamest lygzdu.

“Pirmais tilts” 30 940 eiro kinys ražuošonys 1. pūsmam
(40 min, scenareja autore, producente i režisore Laila Pakalniņa, operators Gints Bērziņš, montažys režisors Ivars Burtnieks, studeja “Kompānija Hargla”)

Kruoslovys tylts ir pyrmais tylts puor Daugovu Latvejis teritorejā – vuorti Daugovai iz Latveju. Tylts ari Kruoslovā, taipoš kai jebkur cytur, vīnoj i dola – 325 metri nu ituos pusis iz tū pusi. Parosts tylts – ni šmuks, ni našmuks, ni viesturisks, ni moderns. Bet tys, kū var redzēt, stuovūt iz ituo tylta, ir cīši plošs i cīši personisks vīnlaikus.

Viests olūts Kulturys ministreja

Komentari slāgti.