Bazneicu naktī ari Latgolys dīvnomi (papyldynuots)

Portals lakuga.lv 25. Majs, 2018. gods Comments Off on Bazneicu naktī ari Latgolys dīvnomi (papyldynuots)

2018.goda 1.junī jau pīktū reizi nūtiks Bazneicu nakts. Šūgod byus īspieja apmeklēt 170 dīvnomus Latvejā, nu tim 16 – ari Latgolā. Vokors suoksīs plkst. 17.50 ar bazneicu zvonu skaņom, kū turpynuos ekskursejis, radūšuos darbneicys, lekcejis, koncerti, kūpeiga lyugšonu skaiteišona i, atzeimejūt vaļsts simtgadi, byus ari kūpeiga himnys dzīduošona.

Latgolā sevkurs interesents varēs apmeklēt četru konfeseju bazneicys: katuoļu, luteraņu, pareizticeigūs i ari Septeituos dīnys adventistu bazneicu Rēzeknē.

Cīši daudzveideiga pasuokuma programa ir Ludzys Jaunovys Marijis dabasūs uzjimšonys bazneicā, kur byus gon koncerts “Dziesma Ludzai, Latgalei, Latvijai”, gon aviacejis kuģa prezentaceja, gon smilkšu teatris “Šūpulis”, kai ari apsaveramys vysaidys izstuodis.

Bazneicu nakts Lūznovys muižā suoksīs plkst. 17.00 ar diskuseju “Socialuos lūmys saimē: tradicionalais i maineigais” piļs Sorkonejā zalā. Diskuseju vadeis Rēzeknis Tehnologeju akademejis asociātuo profesore Angelika Juško-Štekele. Piečuok, 19.00, koncertu Lūznovys muižys kapelā snīgs Cēsu Baptistu draudzis zvonu ansamblis  “Soli deo gloria“. Piec koncerta byus dīvkolpuojums. 

Ari Zīmeļlatgolā byus na mozums interesantu nūtikšonu. Baļtinovys Kunga Jezus Kristus pasludynuošonys katuoļu bazneicā byus īspieja pīsadaleit V. Supes albuma “Latvijas simtgadei” prezentacejā, bet Bolvu Vyssvātuokuos Treisvīneibys katuoļu bazneicā nūtiks kristeiguos dejis ar muosu Diānu.  

Sovukuort Stiernīnis Svātuo Laurencija Rūmys katuoļu bazneicā nūtiks Rēzeknis Juoņa Ivanova muzykys vydsškolys steigu kvarteta koncerts “Atveriet durvis Jēzum” ar naseņ myužeibā aizguojušuos dzejneicys Paulīnis Zalānis gareigū dzeju.

Daugovpilī byus īspieja pagasteit vysūs Bazneicu kolna dīvnomūs, uzzynojūt koč kū jaunu par kotrys bazneicys i draudzis viesturi. Mārteņa Lutera katedralē byus unikala īspieja izdzeivuot Sanktpēterburgys Filharmonejis bīdreibys jaunīšu kamerkūra izruodi “Eņģeļa ēnā”, kas veiduota kai susātivu teatris iz gareigūs tekstu i krīvu Sudraba laikmeta dzejnīku tekstu pamata.  

Vyss Bazneicu nakts Latgolys nūtikšonu saroksts apsaverams ite

Bazneicu nakts ir aicynuojums iz sasatikšonu ar bazneicu kulturys i muokslys montuojumu, gareigū muzyku kotram, kurs gryb ari meditativu klusumu i lyugšonys sveču gaismā. Itei nūtikšona ir praktisks veids, kai veicynuot dažaidu konfeseju i draudžu vīnuoteibu.

 

Komentari slāgti.