Guļbinis nūvoda bibliotekā leidz 6. juļam apsaverama Aritys Strodis-Kļaviņys fotografeju izstuode “Neparastie latgalieši”.

Fotografeju cykls “Neparastie latgalieši” ir taps godu i sadaleits četrūs godalaikūs, kotrā nu tūs uzjimti treis fotostuosti, kas publicāti Facebook.com lopā “Košumbildes”, kūpā veidojūt 12 albumus. Fotografejuos radzamī cylvāki ir vysdažaiduokūs profeseju puorstuovji – muziki, muokslinīki, pūdnīki, tetovātuoji, pasnīdzieji, muojražuotuoji i t.t., turkluot daļa nu jūs atsagrīzuse Latgolā piec dzivis golvyspiļsātā.

Arita Strode-Kļaviņa dzimuse i uzauguse Latgolā, studeju laikā dzeivuojuse Reigā, bet pādejūs pīcus godus ir jelgavneica. Nu 2014. goda struodoj par saimis i svātku fotografi Jelgavā, Reigā i cytuos apleicīnis piļsātuos. “Neparastie latgalieši” ir Aritys pyrmais fotografeju cykls, kas suokūtnieji rodīs personisku īmaslu deļ. “2016. godā nu lauku braucīņa gribējēs puorvest kū vaira par nūsauļuotu dagungolu i ūdu sakūstom kuojom. Kaut kū palīkūšu, nūzeimeiguoku, skaistuoku. Tai roduos ideja par fotostuostu cyklu, kura golvonī varūni byutu breineigī Latgolys cylvāki – tī, kas aplīcynoj, ka Latvejis austrumi nav Syunu cīms, bet gon tikpat aizraujūša i īdvesmojūša vīta kai sevkura eksotiska zeme, kur vairums raunās ceļuot,” stuosta fotografe.

Izstuode īprīkš beja apsaverama Jelgovys Sv. Treisvīneibys bazneicys tūrnī i Mārsroga informacejis centrā, bet augustā naparostūs latgalīšu varēs īpazeit Lūznovys muižā i septembrī Viļanu kulturys nomā.

Foto: publicitatis karteite, Arita Strode-Kļaviņa.
Olūts: Guļbinis nūvoda biblioteka.