Muoksla, pierts i motocikli – kū breivdīnuos dareit Latgolā?

Muoksla, pierts i motocikli – kū breivdīnuos dareit Latgolā?

Itamā nedelis nūgalē Latgolā byus daudz vysaidu interesantu nūtikšonu sevkura gaumei i īspiejom. Lakuga.lv pīduovoj īskotu tamā, kū varēs redzēt, dzierdēt, sajust i izzynuot.

Pīktdīņ, 8. junī, Daugovpiļs cītūksnī nūtiks Muokslys nakts, kū organizej Daugovpiļs Marka Rotko muokslys centrs. Apmaklātuojim byus īspieja baudeit dažaidys muokslys performaņcis, foto izstuodis, vērtīs kinys i teatra izruodis, i īsasaisteit vysaiduos muokslinīciskuos aktivitatēs nu plkst. 22.00 leidz pat 02.00.

Ja pīktdinis vokoru gribīs pavadeit svaigā gaisā i tyvuok pi dobys, tod ir īspieja nu 22.00 leidz 1.00 pīsadaleit nakts putynu vāruošonā i puorguojīnī dobys parkā “Numernes valnis”. Ar putnu dzeivi naktī īpazeistynuos Dobys aizsardzeibys puorvaļdis specialists Dagnis Vasiļevskis. 

Sastdiņ, 9.junī, Daugovpiļs nūvoda Višķūs nūtiks Latvju pierts i zuoļu festivals 2018, kurā vysys dīnys garumā byus nūdereigys tematiskuos lekcejis, darbneicys par augim, zuoļu čajim, stuodim i latvju pierts tradicejom. Byus ari omotnīki, muojražuotuoji i cyti veseleiguo dzeivis veida pīkritieji nu Jelgovys, Ūzūlnīkim, Gulbinis, Daugovpiļs, Lītuvys i tt. Paradzāta ari saistūša programa bārnim ar Pierts gareņa stuostim. Vokorpusē nūtiks festivala kongress “Kas ir latvju pierts?”, kas puļcēs pierts, viesturis, folklorys, volūdys i latviskuos dzeiviszinis jūmys profesionaļus.

Rēzeknē byus īspieja pīsadaleit Aktivuo turisma dīnā, kurys laikā varēs izzynuot vysu par aktivuos atpyutys īspiejom Rēzeknē i Rēzeknis nūvodā, pīsadaleit laivuošonā pa Rēzekni (ar īprīkšeju registraceju). Ja nav saguojs pīsaregistrēt laivu braucīņam, tod pastuov īspieja jimt daleibu velo ekskursejā “Rēzeknis 7 pakolni” voi sekuot leidza veikparka “GoWake” paraugdemonstrejumim Kovšu azara krostā.

Ludzys īdzeivuotuoji i piļsātys gosti  ir aicynuoti apmeklēt Gaismys duorza (Kruoslovys īlā 4A) atkluošonys pasuokumu “Gaismys roksti” plkst. 11.00. Te byus īspieja dzierdēt i redzēt Cyblys, Zylupis, Kuorsovys i Ludzys folklorys kūpu prīkšnasumus.

Sovukuort Daugovpilī turpynuosīs piļsātys svātkim veļteiti pasuokumi. Vīneibys laukumā 14.00 nūtiks rokgrupys ELPA 35 godu jubilejam veļteits koncerts ar dažaidu kūru i Latvejā pazeistamu muziķu pīsadaleišonu. Dubrovina parkā, Andreja Pumpura skverā i Reigys i Vīstura īlys krustuojumā varēs satikt daudz i dažaidus pošdarbnīku kolektivus, kūrus, horeografejis studeju dalinīkus i tt. Daugovpiļs piļsātys svātku  programa apsaverama ite.

Sastdīnis izskaņā var dūtīs ari iz Bolvim, kur nūtiks jau 14. Motociklu vosora, kas suoksīs 17.00 ar paradis braucīni. Vokora gaitā pasuokuma apmaklātuojus īprīcynuos Māris Grigalis, grupa “Vienā vagonā” i Ivo Fomins ar grupu.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]