Dagdā ar stuostim gūdynuos bitinīka omotu

LaKuGa 12. Juņs, 2018. gods 0

20. i 21. julī Dagdā i tuos apleicīnē – Andrupenē, Zundūs, Jaundomis muižā – nūtiks trešais Latgolys stuostnīku festivals, kas itūgod veļteits bitinīka omotam, informej Latvejis stuostnīku asociacejis puorstuove Evija Maļkeviča. Iz festivala pasuokumim aicynoj sevkuru interesentu, eipaši bitinīkus.

Latgolys stuostnīku festivals „Omotu stuosti par bitinīkim” itūgod pīduovoj īspieju īpazeit vīnu nu senuokūs omotu – bitinīka omotu, kas aizviņ ir praktizāts i pīpraseits ari myusu dīnuos. Gaidomajā festivalā byus sastūpami stuostnīki nu dažaidim Latvejis nūvodim i Spanejis, byus īspieja dzierdēt atškireigus dialektus, skaneigys dzīsmis, jautrus i soldonus stuostus nu stuostnīku, bitenīku, vītejūs i gostu folklorys kūpu.

20. julī 14.00 stuņdēs muzejā „Andrupenes lauku sēta” festivalu atkluos ar divim prīkšlasejumim – par tradicionalūs prasmju fotonagativim, kas 20. g.s. suokumā uzjimti Dagdys apleicīnē, i „Senī omoti Dagdā. Bitinīka stuosts”. Sovukuort 16.30 stuņdēs vysi aicynuoti iz Kroma kolnu, kur stuosteis par bitinīka omotu senatnī, i pi guņskura tiks rytynuoti Latvejis nūvodu stuosti. Pyrmuo festivala dīna nūsaslēgs ar pasuokumu „Vokorā, kod bitis guļ…” – vakariešonu, anekdotu i jautrūs stuostu vokoru muzejā „Andrupenes lauku sēta”.

21. juļa reitā bārni ar vacuokim aicynuoti apmeklēt Dagdys nūvoda Tautys biblioteku, kur stuostus stuosteis bārnim. Ūtruos dīnys puorejuos aktivitatis nūtiks Jaundomis muižā, īskandynūt Jaundomis muižys svātkus. 16.00 stuņdēs interesenti aicynuoti iz stuostu piecpušdīni ar nūvoda bitinīkim „Man bej vīna taida bite, kai pārnuo gūtiņeņa” i 19.00 stuņdēs festivala nūslāgumā Jaundomis muižys svātku lelajā sareikuojumā „Biteit’ motūs!”, kurā pīsadaleis gon pošmuoju, gon gostu kolektivi i stuostnīki.

Daleiba publiskajūs festivala pasuokumūs ir bezmoksys.