24. septembra piecpušdīnē pāvests Franciskys svieteis Svātū Mišu Aglyunā, iz kuru ir aicynuoti vysi ticeigī i lobys grybys cylvāki. Kab sagataveitu infrastrukturu i nūorganizātu ārtuoku dalinīku īsarosšonu, nu 8. juļa leidz 19. augustam nūtiks registraceja Svātajam Mišam Aglyunā. Registrētīs varēs katuoļu draudzēs i sātyslopā pavestsLatvija2018.lv.

Vīna persona varēs registrēt vairuokus cylvākus, nūruodūt juo vuordu, pavuordi, īsarosšonys veidu Aglyunā i sovu kontaktinformaceju. Tīm, kas registrēsīs internetā, byus juonūruoda bazneica, kurā gribēs sajimt īejis karti. Īejis kartis Svātuo Miša dalinīki varēs sajimt nu 9. septembra.

Vaira informacejis par registraceju var atrast sātyslopā pavestsLatvija2018.lv, kai ari pi draudžu prāvestim.

Pāvests Franciskys 22. – 25. septembrī apmeklēs Baļtejis vaļsts, 22. i 23. septembrī gasteis Lītovā, 24. septembrī – Latvejā, bet 25. septembrī – Igaunejā. Oficialuos vizeitis programa vēļ nav publicāta, bet zynoms, ka nu reita jis tiksīs ar Latvejis Vaļsts prezidentu, politikim, diplomatim, sabīdreibys puorstuovjim, nūliks pučis pi Breiveibys pīminekļa, pīsadaleis ekumeniskajā dīvkolpuojumā reigys Dūmā i apmeklēs Reigys Sv. Jākuba katedrali, sovukuort piecpušdīnē dūsīs iz Aglyunu, kur Latvejis nūzeimeiguokajā katuoļu svātvītā svieteis Svātū Mišu.

Viests sagataveita piec Latvejis Rūmys katuoļu Bazneicys Informacejis centra snāgtuos informacejis
Karteite: lakuga.lv arhivs