Muokslys piknikā Lūznovā ari latgaliskys nūskanis

Muokslys piknikā Lūznovā ari latgaliskys nūskanis

22. julī Lūznovys muiža i parks jau trešū reizi aicynuos iz muokslys i garšu festivalu – Muokslys pikniks. Muokslys pikniks ir eists vosorys nūskaņu pylns nūtykums dažaidu vacumu i interešu grupu muokslys baudeituojim i vosorys eipašūs šaļteņu pīdzeivuotuojim, kab ļautūs muzykys, muokslys, dejis, garšu, teatra i cytu baudu pylnai svātdinei. Pasuokumā gaidomys ari latgaliskys nūskanis.

Muokslys piknika laikā nu 13.00 leidz 22.00 Lūznovys muižā i parkā meisīs muzykys, teatra, laikmeteiguos dejis, meistarklašu, iesšonys prīcys i cytys nūrisis, ļaujūt nasteidzeigi pavadeit nūtikšonom pīpiļdeitu svātdini Rēzeknis nūvodā ar saimi i draugim.

Ituo goda Muokslys piknika muzykalajai baudai saryupātys grupys “Pērkons”, “Bez PVN”, “Rahu The Fool”, “Tangoriginales”, Evilenys Protektoris džeza kvartets, “Žvūrgzdyni” i cytys uzastuošonys, kai ari naiztryukstūši gosti nu uorvaļstu – itūreiz “Baltic Guitar Quartet” no Lītovys i Silver Sepp nu Igaunejis.

Pasuokumā varēs vērtīs vairuokys laikmeteiguos dejis izruodis, leļļu izruodis lelim i mozim, varēs vērtīs muokslys plenera nūrisi, baudeit kinu festivala “2 Annas” kinu programu, laikmeteiguo Igaunejis cyrka prīkšnasumus, radūšuos darbneicys, literarūs skaitejumus i gruomotu prezentacejis. Muokslys piknika laikā pyrmū reizi kurynuos i izjims eipaši Lūznovys muižai uzcaltū keramikys apdadzynuošonys cepli. Vīna nu svareiguokūs piknika sastuovdaļu ir iedīņa baudeišona – tū sevkurs nasteidzeigi varēs dareit gon eipaši īreikuotuos piknika vītuos, baudūt leidza pajimtūs piknika grūzu saturus, gon “Putni” restoranā muižys Kulturys škiunī, gon ari iedīņu meistarklasēs i cytūs pīduovuojumūs.

Muokslys i garšu festivals byus saryupiejs eipašu programu mozuokajim muokslys baudeituojim, kuri piknika nūrisis byus aicynuoti pīdzeivuot laikā nu 13.00 leidz 19.00 ar dažaidom radūšajom darbneicom, lelajim burbulim, kinom, leļļu izruodi, cyrka muokslinīkim i cytom nūrisem.
Īejis moksa Muokslys piknikā ir 3 eiro, bārnim leidz 12 godu vacumam – bez moksys.

Publicitatis karteite, Raimonds Kaļva.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]