Gribi apsveikt draugu Leigū ci Juoņūs? Īsaver ite!

Gribi apsveikt draugu Leigū ci Juoņūs? Īsaver ite!

Goda eisuoka nakts i garuokuo dīnā ir kluot. Pazeisti kaidu Leigu ci Juoni, kuru gribi apsveikt svātkūs? Ci kaidu jautru panteņu gribi nūsyuteit draugam, babai ci sābram? Pīduovojam latgalīšu tautys dzīšmu izlasi.

Juoņa muote sīru sēja
Devenim styureišim.
Šam styureits, tam styureits,
Maņ pats sīra vyduceņš.

Ejte, meitys, kuodeļuos,
Dzīdit skaistys Juoņa dzīsmis,
Reitu byus Juoņa dīna,
Skaista sauleite leiguos.

Papardeite, ledzirksteite,
Tei ir lela Juoņa zuole.

Pavaicuoju nu Juoneiša,
Kaidu raut pyrmū zuoli.
Rauņ pa prīšku dundurjuoni,
Piec sorkonu uobuļteņu.

Vysu godu Juoneits guoja,
Nu atguoja šūvokor;
Reibej’ zeme atbraucūt,
Skanej’ pīši nūlācūt.

Vysa beja Juoņa zuole,
Kū plyuc Juoņa vokorā;
Kū raun reita sauleitē,
Nikam loba tei nabeja.

Sīra, sīra, Juoņa muot,
Koč nalelu gabaleņu!
Es īkrytu gruoveitī,
Tovu gūvi ganeidams.

Jauni puiši, jaunys meitys,
Juoņa nakti nagulit,
Tūlaik reitā redzēsit,
Kai sauleite rūtuosīs.

Es redzēju Juoņa naktī
Treis sauleitis izlācūt:
Vīna rudzu, ūtra mīžu,
Treša teira sudabreņa.

Kas tur speid, kas tur viz
Papardeišu kryumeņā?
Juoņa sīva zuolis losa,
Pylnys kryutis sudabreņa.

Kura guļ Juoņa nakti,
Myužam veira nadabuos;
Es leiguoju Juoņa nakti,
Maņ byus kuozys šūrudiņ.

Juoneits klīdze, Juoneits sauce,
Juoņa bārni izkleiduši;
Pyut, Juoneit, vara trubu,
Sasauc sovus Juoņa bārnus.

Es jums soku, jauni puiši,
Juoņa nakti nagulit:
Ka gulēsit Juoņa nakti,
Tod dabuosit vacys sīvys.

Dūd, Dīveņ, Juoņa muotei
Ilgi dzeivuot, lobu redzēt:
Šolka svuorkus šyudynuot,
Samtu likt pakryutē.

Gaidi, gaidi, muomuleņ,
Atīt tovi Juoņa bārni,
Satīt tovi Juoņa bārni,
Juoņa zuolis kaiseidami.

Kurit lelu Juoņa guni
Pošā Juoņa vokorā!
Juoņa bārni sasoluši,
Juoņa zuolis laseidami.

Atīt Juoneits par kalneņu
Boltu zīdu vaiņukā,
Boltu zīdu vaiņukā,
Tur sīreņu teikleņā.
Kas Juoneiti paleiguos,
Tam īdūs sīra, pīna.

Juoneits guoja godskuortā
Sovu bārnu apraudzeitu,
Voi jī ēde, voi jī dzēre,
Voi jī skaiški padzīduoja.

Vysi kūceni zīdēja,
Papards viņ nazīdēja;
Papards zīd Juoņa nakti
Sudabreņa zīdenim.

Eisa beja Juoņa nakts,
Varim kuojom sastaiguot;
Vīna puse tymsiņ tymsa,
Ūtra gaiša gaišaleņa.

Kūpā, kūpā
Lai Juoneišus īleiguosim!

Nūtikšonu kalendars

Dec
11
Ūtr
14:00 Viesturis šaļteņu pītura “Piemin... @ Latgolys Kulturviesturis muzejs
Viesturis šaļteņu pītura “Piemin... @ Latgolys Kulturviesturis muzejs
Dec 11 @ 14:00
Viesturis šaļteņu pīturā pīminēs vyspuseigū Latgolys personeibu Ontonu Slišānu, atguoduos kūpā muzejā pavadeituos šaļts, byus sasatikšona ar O. Slišāna tyvinīkim.Drukavuot
Dec
13
Cat
19:00 Gruomotys “Latgales pēdējie mohi... @ Reigā, Veru īlā 6
Gruomotys “Latgales pēdējie mohi... @ Reigā, Veru īlā 6
Dec 13 @ 19:00
Gruomotys "Latgales pēdējie mohikāņi" attaiseišona @  Reigā, Veru īlā 6 | Rīga | Latvija
Gruomota topuse vairuoku ekspediceju rezultatā, kuruos folkloriste i Zīdūņamuzeja pietneica Rūta Šmite kūpā ar antropologi i fotografi Elīnu Kursīti vuokušys cylvāku stuostus i īmyužynuojušys Latgolys mozcīmu īdzeivuotuojus fotografejuos. Gruomotu veidoj 52 stuosti, kurus papyldynoj vizuali boguoteigys[...]