Juļa izskaņā svinēs “Annas Dagdā”

LaKuGa 16. Juļs, 2018. gods Comments Off on Juļa izskaņā svinēs “Annas Dagdā”

Nu 27. leidz 29. juļām nūtiks Dagdys nūvoda svātki “Annas Dagdā”. Itūgod svātku programā uzsvers latvīšu tautys identitati, pīdereibu dzimtinei i ari unikalitati kulturā, volūdā i dzeivis ziņā, nūruoda pasuokuma dorba grupys koordinatore Inese Plesņa.

27. julī, pīktdīnē, jau nu ogra reita Dagdys tiergā i piļsātys skverā nūtiks dažaidys aktivitatis i izklaidis. Godatiergā varēs nūpierkt vītejūs muojražuotuoju i amatnīku darynuojumus, gon gostu darynuojumus. Popularizejūt Dagdys nūvoda turisma pīduovuojumu, godatiergā pīsadaleis muzejs “Andrupenes lauku sēta”, Vidis izgleiteibys i kulturys centrs “Ķepa” i Jaundomes muižys vidis izgleiteibys centrs, stuostūt par ituos sezonys aktualajim pīduovuojumim. Dorbuosīs ari amatnīku radūšuos darbneicys.

Laukumā pi dūmis 10.30 stuņdēs nūtiks saceņseibu „Latvijas spēcīgākā pilsēta” Dagdys pūsms. Daugovpiļs Byuvnīceibys tehnikuma stadionā 12.00 stuņdēs dorbuosīs mobiluo viervju trase i nūtiks Zumba Fitness maratons treis stuņžu garumā. Sevkuram svātku gostam byus īspieja izbaudeit korstūs Zumba dance ritmus, kai ari īsapazeit i iz sovys uodys izbaudeit Jumping Fitness studejis (Daugovpils) fitnesa programu.

Vokorpusē 19.00 stuņdēs Dagdys breivdobys estradē byus Folkmuzykys vokors ar grupom „Iļģi” i „ImantaDimanta un draugi”. Īsastuojūt tymsai, basketbola ceineituoji varēs pīsadaleit ci atbaļsteit spālātuojus nakts strītbola turnirā JIC „Parka rozes” laukumā.

28. julī, sastdīņ, jau nu 10.00 stuņdem Dagdys azara pludmalē Jelgovys īlā teik aicynuoti pludmalis volejbola spālātuoji i atbaļsteituoji.
Pušdīņlaikā sevkurs interesents varēs vāruot, kai nūteik cepļa izjimšona Evijas Maļkevičas keramikys darbneicā „Runčuki” (Ezermali, Andrupenis pogosts). Pošvaļdeiba nūdrūsynuos bezmoksys transportu nūkliušonai. Sovukuort Dagdys Muižā nūtiks zyrgu rikšuotuoju saceņseibys.

20.00 stuņdēs Dagdys breivdobys estradē izskanēs Dzīšmu i deju svātku atskaņu concerts. Piec koncerta nūtiks konkursa “Dagdas novada ziedu dzīpari Latvijas villainē” laureatu apbolvuošona, nūslāgumā zaļumbals ar Arno i Bernadetu Eversim.

29. julī, svātdīņ, 14.00 nūvoda īdzeivuotuojus i gostus aicynoj iz Beresnes Rūmys katuoļu bazneicu iz Sv. Annys dīnys atlaidom. Pošvaļdeiba nūdrūsynuos bezmoksys transportu nūkliušonai.

15.00 stuņdēs Dagdys breivdobys estradē nūtiks Putu balleite bārnim, bet svātku nūslāgumā varēs vērtīs animacejis kinu „Kukaiņu slepenā dzīve”. Vysi pasuokumi ir bezmoksys, vaira informacejis dagda.lv.

Komentari slāgti.