Pyrmūreiz nūtiks Vyspasauļa drycanīšu saīts

LaKuGa 17. Juļs, 2018. gods Comments Off on Pyrmūreiz nūtiks Vyspasauļa drycanīšu saīts

Roksta autors: portals lakuga.lv

2018. goda 4. i 5. augustā Rēzeknis nūvoda Drycanūs pyrmūreiz nūtiks Vyspasauļa drycanīšu saīts “Es – drycanīts”, kura laikā byus īspieja īsaklauseit dzymtu i atmiņu stuostūs, apsavērt dažaidys izstuodis, padoncuot i pat paspēlēt volejbolu. Saīts teik skaiteits par vīnreizeju īspieju sasatikt, pasarunuot, pasaklauseit, pavāruot i pīsadaleit.

Dalinīku registraceja suoksīs 4.augustā plkst. 14.00 Drycanu Kulturys nomā. Vysys dīnys garumā byus daudz vysaidu nūtikšonu.

Apmaklātuoji i saīta dalinīki ir aicynuoti pīsadaleit stuostu i sarunu pasuokumūs. 4.augustā plkst. 14.00 Drycanu Kulturys nomā byus “Sātu stuosti”, bet plkst. 18.00 nūtiks “Drycanīšu pastuoški”. Piecpušdīnē ir paradzāta ari gasteišona Drycanu vydškolā, kur zaļajā klasē drycanīši vīns ūtram atkluos sovus stuostus pi kompota gluozis.

Byus ari vysaidys aktivitatis bārnim i jaunīšim, kai ari centra laukumā nūtiks dzymtu volejbola mači. Piec sportiskuom aktivitatem vareis nūbaudeit “Drycanu spāka putru”.

4.augusta vokorā plkst. 18.00 saīts tiks ļusteigi svieteits ar pogosta pošdarbnīku kolektivu i gostu koncertu “Driči saņ”, bet vāluok, plkst. 22.00, bierztolys estradē nūtiks zaļumbals ar vītejim muzykantim.

Saīta laikā byus apsaveramys divys izstuodis: fotoizstuode “Drycani 100 godūs” i Raibuo karikaturu izstuode. Sevkurs vareis izdrukuot sovu fotokarteiti, īsasaistūt fotošalteņu akcejā “Zibsnis”.

Byus ari tierdzeni. Pīters Luocs gon 4. augustā, gon 5. augustā organizēs gruomotu goldu Drycanu kulturys nomā, bet 5. augustā nu plkst. 9.00 pi kulturys noma byus īspieja īsaguoduot vysaidus omotnīku i sātys ražuotuoju lobumus tierdzeņā “Lobs lobam”.

Dricanīšu saīts nūsaslēgs 5. augustā ar Sv. Mišu plkst. 11.00 Drycanu bazneicā i kopusvātkim plkst. 12.30 Drycanu kopūs.

Drycanu pogosts izaveiduojs piec 1861. goda, bet nūsaukums radīs nu vuorda ‘driči’ voi ‘drycynuot’. Leidz 1940. godam Drycani beja Rēzeknis apriņčī kai vīns nu 19 pogostim. Piec 1945. goda Drycanus īkļuove Viļanu rajonā, bet vāluok – otkon Rēzeknis rajonā. 1960. godūs suocēs puoreja iz cīma padūmem, i Drycani beja vīns nu tim cīmim, kas sagobuoja sovu pašpuorvaļdi ari piec cīma padūmu apvīnuošonys. 2009. godā Drycanu pogostu īkļuove Rēzeknis nūvodā.

Iz 2017. goda vydu Drycanu pogostā beja 1029 īdzeivuotuoji. Nu Drycanu pogosta īt taidi latgalīšu kulturā pazeistami cylvāki kai barons Gustavs Manteifeļs (1832 — 1916), latgalīšu rakstnīks Jezups Kindzuļs (1888–1941), Latgolys viesturis pietnīks Boleslavs Brežgo (1887 – 1957), gruomotizdeviejs Vladislavs Luocs (1912 —1984), dirigenti Stanislavs Broks (1926 – 1977) i Ontons Matvejāns (1937 – 2008). Te dzymtuo puse ir ari gruomotizdeviejam Juoņam Elkšņam, varganistei Ivetai Apkalnai (dzymuse Viļuma), muzikalajai Eriņu saimei, multimuokslinīkam Raibajam i cytim.

Komentari slāgti.