Viļakā ar koncertu atguoduos dzīsminīku Aini Šaicānu

Viļakā ar koncertu atguoduos dzīsminīku Aini Šaicānu

4. augustā Vīļakā nūtiks dzīsminīka, grupys “Leijerkastnieki” vadeituoja, sporta i sabīdriskuo darbinīka Aiņa Šaicāna atguoduošonys pasuokums “Es pārnākšu”. Koncerts pulcynuos Aiņa draugus i kolegys, kas izpiļdeis juo sacarātuos dzīsmis.

“Vysā Latvejā ir zynomys i jūprūjom teik dzīduotys daudzys Aiņa Šaicāna sacarātuos dzīsmis, kai pīmāram, “Meža dziesma”, “Es pārnākšu”, “Mārtiņrožu sveikas”. Svareiguokais, kū var pasceit par Aini, ir tys, ka jis mīlēja sovu zemi i itū mīlesteibu aplīcynuoja sovūs dorbūs. Nu jau rit septeitais kods kai A. Šaicāns ir aizguojs myužeibā. 2017. goda vosorā roduos dūma sareikuot dzīsminīka atguoduošonys pasuokumu. Daleibai koncertā atsasauce vaira nikai 75 dalinīki, kai ari plošs klauseituoju lūks. Vyss nūteikūšais radeja eipašu emocionalu gaisūtni, kas radeja puorlīceibu, ka īsuoktais dorbs juoturpynoj,” stuosta pasuokuma organizators Māris Lapāns.

Aiņa Šaicāna atguoduošonys pasuokumā skanēs vyspuorzynomys A. Šaicāna sacarātuos melodejis, eipaša uzmaneiba byus pīvārsta dzīsmem, kuruos Aiņs ir pauds sovu mīlesteibu pret dzymtū zemi, vītu, nu kurys guojs. Viļakys nūvods ir Aiņa Šaicāna dzymtuo puse, par tū koncerts “Es pārnākšu” byus juo simboliska atsagrīzšona dzymtajā vītā, nūruoda M. Lapāns.

Koncertā A. Šaicāna dzīsmis izpiļdeis dažaidi, vairuok ci mozuok zynomi muokslinīki, kas ir bejušī Aiņa kolegys, draugi ci vīnkuorši juo talanta cīneituoji. Koncertā pīsadaleis Andris Baltacis, Nikolajs Puzikovs, Aivars Lapšāns, duets “Gunārs un Zane”, Ginta Zābele, Egons Salmanis, Jānis Ločmelis, Māris Lāpāns, Modris Teilāns, Larisa Kļaviņa, Vilis Cibulis, Marija Maslovska, Ingrīda Šaicāne i Sanda Kļaviņa, Saļņovys kapela, Vactylžys daņču kūpa “Viola”, Kubulu vokalais ansamblis i c. Pavadejumu solistim nūdrūšynuos muzykaluo apvīneiba “Ainis”. Speciali itam pasuokumam kūpā byus saguojuse i vairuokus prīkšnasumus snēgs grupa “Leijerkastnieki”. Koncerta suokums 19.00 stuņdēs laukumā pi Viļakys piļsātys estradis, piec koncerta 22.00 stuņdēs sekuos zaļumbals ar grupom “Mani Mākoņi”, “Unknown Artist”, Ingu i Normundu, Nikolaju Puzikovu i dj Čivix.

Īprīkšpuordūšonā koncerta bileta cena 4.00 eiro, iz zaļumbalu 4.00 eiro, pierkūt iz obejim pasuokumim kūpā 6.00 eiro. Pasuokuma dīnā kotram pasuokumam īejis moksa 5.00 eiro. Bārnim leidz 10 godu vacuma īeja bezmoksys. Biletus var nūpierkt Biļešu paradizis kasēs, Viļakys Kulturys noma i Bolvu Kulturys i atpyutys centra administracejuos.

Publicitatis karteite.