Ar vierīni svinēs Latgolys dīnu Reigā

LaKuGa 6. Augusts, 2018. gods 0

Roksta autors: portals lakuga.lv

18. augustā Reigys svātku laikā nu 10.00 leidz 19.00 stuņdem Jākuba laukumā svinēs Latgolys dīnu, itaids pasuokums nūteik jau pīktū reizi. Latgolys dīnā Reigā redzinīki i piļsātys gosti varēs apmeklēt ceļojušū tiegu, vāruot amatnīku dorbuošonūs, prīcuotīs par latgalīšu tautys muzyku, daņčim i dzeivisprīcu, informej pasuokuma organizatori.

Latgolys amatnīku tiergā varēs nūpierkt lobumus nu Latgolys tematiskūs cīmu – smuordeigu, iz kļovu lopu captu maizi, sātys sīru, galis izstruoduojumus, sātys veinus i olu, dažaidus gordumus, zuoļu čajus, tradicionalū Latgolys keramiku i amatnīku darynuojumus, kuru omota nūslāpumus varēs vāruot ari kluotīnē. Svātku gaisūtni uzburs muzikis i raidejumu vadeituojs Ēriks Zeps, dīnys gaitā varēs kūpā ļustēt ar postfolklorys grupu “Rikši”, dzīšmu i daņču kūpu “Svātra”, Lūznovys muižys kadriļu draugu klubu, folklorys kūpom nu Vuorkovys i Baļtinovys nūvodu. Pasuokuma laikā varēs izzynuot ari par turisma īspiejom Latgolā.