Festivals “Upītes Uobeļduorzs” aicynoj sasatikt jau septeņpadsmytū reizi

LaKuGa 3. Septembris, 2018. gods Comments Off on Festivals “Upītes Uobeļduorzs” aicynoj sasatikt jau septeņpadsmytū reizi

Rokstu sagataveja: portals lakuga.lv

Sastdiņ, 15. septembrī, septeņpadsmytū reizi Vileks nūvoda Upītē vacuokajā latgalīšu muzykys i aiļu festivalā pasaulī “Upītes Uobeļduorzs” sasatiks latgalīšu muziki i apvīneibys “Dabasu Durovys”, “Latgalīšu Reps”, “Rikši”, literati Raibīs, Ilze Sperga, projekts #100dečiLatvijai i daudzi cyti. Ituo goda festivala eipašuo gaška byus aktrise Zane Jančevska ar koncertprogramu “Dziesmu Dance”.

“Upītes Uobeļduorzs” itūšaļt ir vīneigais festivals, kurs namaineigi kotru godu pulcynoj latgalīšu literatus i muziķus,  īpazeistynoj kai ar jaunim vuordim latgalīšu kulturā, tai aicynoj latgalīšu muzyku i literaturu atkluot kotram grybātuojam. Kotru godu festivals pasaryupej ari par kaidu eipašū gostu – pārn tys beja muzikis Renārs Kaupers, pyrma tuo gon dzīsminīks Kārlis Kazāks, gon grupys “Inokentijs Mārpls”, “Gain Fast” i cyti gosti, bet itūgod festivalā ar atzineibu dabuojušū tautysdzīšmu i nūstuostu koncertprogramu “Dziesmu Dance” pīsadaleis aktrise Zane Jančevska – kūrzemneica, kuruos dzimtys saknis ari atrūnomys Latgolā – nu iteinis guojs juos tāvs.

Festivalā “Upītes Uobeļduorzs” 15. septembrī izastuos muziki i grupys: “Dabasu Durovys”, “Latgalīšu Reps”, “Rikši”, folkloras kūpa “Upīte”, “Ginc un Es”, “Piparmētra”, “Gandreiž 10nīkā”, “Trešīs Ņutona lykums”, “Metrs”, Vinsents Kūkojs i grupa “Trikmīņs”, “Unknown Artist”, “Kei-Rei”, apvīneiba “Arns i Doms”. Literari festivalā prīcēs Mārīte Slišāne, Ligija Purinaša, Raibīs, Karonhisake, Mārīte Bikovska, Ilze Sperga, Ineta Atpile-Jugane, Līvija Liepdruviete, Rībeņu nūvoda radūšuo grupa “Mūka ķēķis”, kai ari Annele Slišāne ar projekta #100dečiLatvijai stuostim.

Meilys aiļu i dzīšmu festivala “Upītes Uobeļduorzs” īsuokums meklejams 2002. godā, i tys ir vacuokais da ituo pastūvuošais latgalīšu festivals pasaulī. Pasuokuma idejis autors ir latgalīšu literats, nūvodpietnīks, folklorists Ontons Slišāns, kurs īsadūmuoja sataiseit sovpateigu dzejis dīnom veļteitu festivalu, kab popularizātu i saglobuotu latgalīšu volūdu. 2018. gods gon Upītē, gon cytvīt teik aizvadeits Ontona Slišāna 70. jubileja, kurū jis byutu svietejs 28. decembrī, zeimē. Itūšaļt festivala organiziešonu turpynoj Ontona dāls Andris Slišāns ar saimi, saglobojūt festivalu kai kasgadeju latgalīšu sasatikšonys reizi i turpynojūt tradiceju, ka kotram muokslinīkam vysmoz vīna dzīsme voi dzejūļs juoizpylda latgaliski, nu puorsvorā festivalā latgalīšu volūda skaņ symtproceņteigi.

Pārnejā godā piec festivala tyka atruodeita ari “Upītes Uobeļduorzs” himnys jaunuo verseja, kuruos īrokstā pīsadaleja vairuoki Latvejā populari muziki – Māra Upmane-Holšteine nu grupys “Astro’n’out”, grupys “Prāta Vētra” solists Renārs Kaupers, Kaspars Zlidnis nu “Gain Fast” liders, “Bez PVN” dalinīki Guntis Rasims i Kristaps Rasims, grupys “Borowa MC” soliste, dzīduotuoja Guntra Kuzmina-Jukna, kai ari pats dzīsmis jaunuos aranžejis autors, grupys “Dabasu Durovys” muzikis Arnis Slobožanins. 

 

Festivala īejis beleti byus nūpārkami iz vītys pyrma pasuokuma 15. septembrī, festivala suokums 19.00. Beletu cena nu 18.40 da 19.00 byus 3,00 €, piečuok 5,00 €. “Upītes Uobeļduorzs” reikuotuojs ir Namaterialuos kulturas montuojuma centrys “Upīte”.

Festivala nūtikšonu atbolsta Vaļsts kulturkapitala fonds, Vileks nūvoda dūme, ZS “Kotiņi”, SIA “Dolo”, SIA “Advors”, Zīmeļlatgolys laikroksts “Vaduguns”, Latgalīšu kulturys ziņu portals lakuga.lv i bīdreiba “Latgolys Producentu Grupa”.


Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzeklim.

Komentari slāgti.