Fotografeju izstuodē atkluoj Sakstagola viesturi 100 godu garumā

Portals lakuga.lv 5. Septembris, 2018. gods Comments Off on Fotografeju izstuodē atkluoj Sakstagola viesturi 100 godu garumā

Rokstu sagataveja: portals lakuga.lv

Tyvojūtīs Latvejis vaļsts symtgadei palīk aktuals vaicuojums par tū, kas pīdzeivuots pādejūs 100 godūs. Tū var īraudzeit ari caur fotografejom. Rēzeknis nūvodā Fraņča Trasuna muzejā “Kolnasāta” apsaverama fotografeju izstuode “Sakstagals un tā iedzīvotāji fotogrāfijās 1918. – 2018.”.

Izstuode dūd īspieju īsavērt Sakstagola pogosta viesturis puslopuos, cylvāku sejuos, pogosta i tuo īdzeivuotuoju dzeivēs nūzeimeiguos nūtikšonuos, kas īmyužynuotys fotografejuos laika pūsmā nu 1918. leidz 2018. godam, atkluoj muzeja kruojuma globuotuoja Inta Deksne.

Sakstagola vuords viesturis olūtūs pyrmū reizi mynāts jau 1582. godā, Sakstagola pogosts izveiduots 19. godu symta beiguos i tys ītylpa Rēzeknis apriņčī. Sakstagolā dzymušs taidi īvārojami cylvāki kai bazneickungs i politikis Fraņs Trasuns, literate i Fraņča Kempa dzeivisbīdre Konstance Daugule-Kempa, goreidznīks i tautys dzīšmu kruojiejs Fēlikss Boļeslavs Laizāns, rakstnīks Raimonds Trasuns, goreidznīks, Rēzeknis školuotuoju instituta direktos, žurnala “Katōļu Dzeive” izdeviejs Dominiks Jaudzems i cyti.

Izstuodē pamatā apsaveramys karteitis nu F. Trasuna muzeja “Kolnasāta” kruojuma. Muzeja izstuožu noma foaje izstuodi var apsavērt leidz 15. oktobram.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzeklim.

Komentari slāgti.