Izguojuse jauna Annys Rancānis dzejis gruomota “Prīca i klusiešona”

Izguojuse jauna Annys Rancānis dzejis gruomota “Prīca i klusiešona”

Rokstu sagataveja: portals lakuga.lv

Taišni itamuos dīnuos septembra golā izguojuse jauna Latgolys dzejneicys, literatis, žurnalistis, publicistis i ari dramaturgis Annys Rancānis dzejis gruomota “Prīca i klusiešona”, kurymā skaitomi pādejūs godūs saraksteitī vaira nikai symts autoris dorbi kai latgalīšu, tai latvīšu literarajā rokstu volūdā.

Anna Rancāne ir myusu dīnu Latgolys spylgtuokuo raksteituoja. Gruomotā “Prīca i klusiešona”, dzeja, kas leluokā daļā ir latgaliski i raksteita laikā nu 2012. da 2018. goda, sasamej ar dīnysgruomotys tipa eisprozys tekstim, kurūs poša autore sauc par naktsrokstim i kurūs hronologeja īzeimej saraksteišonu nu 2008. da 2011. godam. Iz tū atsaverūt, Anna atsazeist, ka tys sakrits ar krizis laiku i vaira tai navarātu raksteit. Bolstūtīs iz itūs naktsrokstu, 2017. goda aprelī Lūznovys muižā topa literari muzykals izvadums “Atlaižu”, kurū kūpā ar Annu Rancāni taisejuse režisore Māra Zaļaiskalns, aktrise Vizma Kvēpa i muzike Kristīne Kārkle-Kalniņa. Poša Anna par jaunuo kruojuma izīšonu soka: “Jaunys gruomotys izīšona ir svātki bez šaubu. Koč kuo nūslāgums. Ari koč kuo nūškieršonu nu sevis.”

Dorbu kruojuma muokslineica ir Gundega Rancāne, kurū ar Annu saista attuola radnīceiba – obys guojušys nu vīnys Rancānu dzimtys dažaidu zoru. Sasadorbuot ar Gundegu Anna Rancāne gribiejuse jau seņ, jo ašņaradnīceiba nav bejs pats golovnais – svareiguoka ruodejusēs gareiguo tyveiba i dzeivis saprasšona – šaļtim ekspresiva, kruosaina, šaļtim niaņsāta i apcereiga. Gruomotā Annys literarūs dorbus izkruosoj ostonis Gundegys Rancānis gleznys, kū vīnā stuostā salykuse muokslineica, maketātuoja Daina Salmiņa. Kruojuma “Prīca i klusiešona” literaruo redaktore ir Ilze Sperga.

“Prīca i klusiešona” ir jau ostoitais Annys Rancānis dzejūļu kruojums. Īprīškejais autoris dzejis kruojums “Bezdelīgu pasts/Pylni kārmani dabasu” izguoja 2012. godā, sajemūt kai Latvejis Literaturys goda bolvys “LaLiGaBa” “Specialbolvu Latvejis literaturā 2013”, tai Latgalīšu kulturys goda bolvu “Boņuks 2012” nominacejā “Lobuokuo dzeja”. Pādejūs godūs Annys Rancānis vuords vaira vys tik izskaniejs dramaturgejis žanrā – Latgolys viestnīceibā GORS tope koncertizvadums “Francis”, bet Latvejis Nacionalajā teatrī īstudāta Annys luga “Bišumāte un vilkacis”. Anna ir ari pārn izdūtuos, Rāznys Nacionaluo parka desmitgodu jubilejai veļteituos gruomotys “Rāznas Nacionālajam parkam 10” autore. Bet 2016. godā izguojs latgalīšu muziķa Sovvaļnīka trešais albums “Napaseitynuots”, kas veļteits taišni Annai Rancānei i juos dorbim.

Dzejis kruojuma “Prīca i klusiešona” izdeviejs ir bīdreiba “Latgolys Studentu centrs”, kurai itys ir jau ūtrais izdūtais autoris dzejis kruojums. Gruomotys izdūšonu atbaļstiejuši Vaļsts kulturkapitala fonds i Rēzeknis nūvoda pošvaļdeiba.

Interveja ar Annu Rancāni par jaunū gruomotu i raksteišonu – “Dzeja ir ekskluziva līta, cīši ekskluziva”

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.

Nūtikšonu kalendars

Dec
11
Ūtr
14:00 Viesturis šaļteņu pītura “Piemin... @ Latgolys Kulturviesturis muzejs
Viesturis šaļteņu pītura “Piemin... @ Latgolys Kulturviesturis muzejs
Dec 11 @ 14:00
Viesturis šaļteņu pīturā pīminēs vyspuseigū Latgolys personeibu Ontonu Slišānu, atguoduos kūpā muzejā pavadeituos šaļts, byus sasatikšona ar O. Slišāna tyvinīkim.Drukavuot
Dec
13
Cat
19:00 Gruomotys “Latgales pēdējie mohi... @ Reigā, Veru īlā 6
Gruomotys “Latgales pēdējie mohi... @ Reigā, Veru īlā 6
Dec 13 @ 19:00
Gruomotys "Latgales pēdējie mohikāņi" attaiseišona @  Reigā, Veru īlā 6 | Rīga | Latvija
Gruomota topuse vairuoku ekspediceju rezultatā, kuruos folkloriste i Zīdūņamuzeja pietneica Rūta Šmite kūpā ar antropologi i fotografi Elīnu Kursīti vuokušys cylvāku stuostus i īmyužynuojušys Latgolys mozcīmu īdzeivuotuojus fotografejuos. Gruomotu veidoj 52 stuosti, kurus papyldynoj vizuali boguoteigys[...]