Zvoni – viesturis i styla līcinīki

Zvoni – viesturis i styla līcinīki

Roksta autori: Ināra Groce, Māris Justs, žurnals “A12”

Latgolys regions puorsteidz ar vysaidom sovpateigom kolekcejom, kurys veidoj aizrauteigi cylvāki. Muokūņkolna pogosta Lipuškūs var īsapazeit ar 6000 zvanenim, kuru eipašneica ir Ludmila Merkulova. Ludmila ir viesturis školuotuoja, niule gon peļneitā atpyutā i kotram kolekcejis skaneigajam eksemplaram ir sovs viesturis i pīdzeivuojuma stuosts.

Ludmila jau sešus godus veidoj vysaidu motivu, materialu i tematikys zvaneņu kolekceju. Īmīļuots motivs ir Anglejis varys mainis i karalīnis. Kotrai nu viesturiskūs personu ir sovs veidūls bronzys zvaneņā, i jī atsarūn kolekcejā. Taišni Anglejā dzeivoj vysleluokī zvonu mīļuotuoji, Anglejis karalīnis Viktorejis laikā zvonus duovynuoja kuozuos, kas soveigs tikai juos vaļdeišonai. Tok “Lady bell“ zvonu kolekcejā var atpazeit tālus i tārpus sātys kolpuotuojim i ustobys meitom, kotrai nu jūs ir sovs vuords. Symtgadeiguos miseņa jaunkuņdzis kolonialā laikā sauce ustobys meitys pakolpuot. Metala školys zvaneņus Anglejā vēļ da ituo pat laika izmontoj stuņžu suokumam i nūslāgumam.

“Kod es īsaguodoju kaidu zvonu, es par jū mekleju, vuocu i losu informaceju, interesejūs par ražuotuoju. Kolekcejā ir 1774. godā ražuots zamiļksts zvaneņš, meistara Georgeja Teplovanova nu Nižnijnovgorodys meistardorbs. Zvons tyka izmontuots posta zyrgu treisjiugam, tyvojūtīs posta stacejai, skanis beja dzieržamys nu div jiudžu attuoluma i viesteja, ka vajag gataveit zyrgu maiņu. Iz lelajim ceļu traktim viņ posta zyrgim beja atļauts braukt ar itaidim skaneigim zvonim. Metala kuģa kluoja zvonu atškir eipaša skaņa, tys ir „Titanika“ zvonu kopeja, ražuota tamā pat kuģa godā. Ir speciali zvaneni, kurus pīkar dzeivnīkim, pīmāram, ari zylūnim, partū ka izaruoda, itī mylzu dzeivnīki puorsavītoj cīš klusu i najauši var sameideit cylvākus.”

Zvonu kolekcejā teik puorstuovātys gondreiž vysys vaļsts, i Ludmila var stuosteit par zvona i vaļstu viesturis nūtykumim: “Cīš ratai goduos zvoni, kurus ražuoja viņ Anglejis karalīnis Elizabetis II krūniešonys svātkim, mozys serejis ar numerim. Kolekcionara mierkis ir savuokt pylnu kaida ražuotuoja zvona sereju. Kotra porcelana fabrika Anglejā, Vuocejā i cytuos vaļstīs, ari ASV i Krīvejā, izgatavejūt nūteiktu trauku lineju, pi ituos trauku serejis pīskaņuoja ari leidzeiga veida zvaneņu. Kotrai fabrikai ir nūteikta sova zvaneņa forma. Tibetys rituala zvaneņš uorstej ar skaņu, partū ka mūki zyna eipašu zvonu ražuošonys tehnologeju. Jī nadaudz atsaškir nu puorejūs, pats skaneiguokais ir pats stypruokais, kura skaņa vēļ turpynoj dimdēt piec zvaneņa nūlikšonys. Tibetys mūki veic ritualu ar itim zvanenim, ari ASV uorstu pietejumūs ir pīzeits, ka zvona skaņa uorstej slymūs.”

Kolekcionari var apbreinuot – septeņdesmitgadeiguo kuņdze ir izaudzynuojuse desmit bārnus i niule auklej 14 mozbārnus, optimistiski smaida i ir gotova daleitīs sovuos zynuošonuos i dzeivisprīcā. Zvaneni atspīgelej dizaina i kulturvidis atteisteibys sovpateibys – nu kūšu rokoko zeimiejumu da attureigu minimalisma formu myusu dīnuos. Kotra porcelana ryupneica konkretai trauku linejai pīskaņuoja sovys formys i izskota zvaneņu. Skaistuokuos viesturis puorsokys ir zvaneņu zeimiejumūs i formuos, i tei ir īspieja i apmaklātuojam, i kolekcionaram iz šaļti pabyut cytā izplatejumā.

Roksts sagataveits sadarbeibā ar portalu lakuga.lv ar Vaļsts regionaluos atteisteibys agenturys finansialu atbolstu nu Latvejis budžeta līdzekļu projekta “Robežlīnijas” ītvarūs.

Nūtikšonu kalendars

Dec
13
Cat
19:00 Gruomotys “Latgales pēdējie mohi... @ Reigā, Veru īlā 6
Gruomotys “Latgales pēdējie mohi... @ Reigā, Veru īlā 6
Dec 13 @ 19:00
Gruomotys "Latgales pēdējie mohikāņi" attaiseišona @  Reigā, Veru īlā 6 | Rīga | Latvija
Gruomota topuse vairuoku ekspediceju rezultatā, kuruos folkloriste i Zīdūņamuzeja pietneica Rūta Šmite kūpā ar antropologi i fotografi Elīnu Kursīti vuokušys cylvāku stuostus i īmyužynuojušys Latgolys mozcīmu īdzeivuotuojus fotografejuos. Gruomotu veidoj 52 stuosti, kurus papyldynoj vizuali boguoteigys[...]