Saruna ar kinys “Piļsāta pi upis” golvonū akteri Dāvi Suharevski

Portals lakuga.lv 5. Oktobris, 2018. gods 0

Roksta autoris: Laura Melne i Vineta Vilcāne

Itūvosor vairuokuos Latgolys vītuos uzjēme Vīstura Kairiša kinu “Piļsāta pi upis”. Tuos golvonais akters ir divdesmit četrus godus vacais DĀVIS SUHAREVSKIS nu Gaigalovys. Dāvis ir dzeivisprīceigs i jautrys, jam pruots namiteigi nasās iz jūku, kas atsakluoj ari sarunā ar jū. Suokūtnieji iz vaicuojumu jis atsoka ar izdūmuotom situacejom, bet piec kūpeigys izasmīšonys izadūd tikt pi gūdeigom atbiļdem. Ruodīs, ka juo personeiba sapas ar kinys žanru – tragikomedeja.

Spieļkinys “Piļsāta pi upis” filmiešonu suoce itūgod februarī, bet akterus tai suoce meklēt jau īprīkš. Byut par akterim kinā aicynuoja sevkuru, vajadzēja vīņ pīsasaceit i dūtīs iz prūvem. Tai ari darejs Dāvis, suokūtnieji nūsyutejs video pīsacejumu, piečuok jū aicynuojuši iz prūvem, i tod jau bejs juobrauc filmētīs. Jaunais akters gon nabeja ceriejs, ka jū izavielēs golvonajai lūmai, gribiejs viņ nadaudz pasafilmēt kinā. Pirms filmiešonuos kinā Dāvim jau bejuse aktera pīredze, partū ka aktivi dorbuojīs improvizacejis teatrī “Ārprāts”.

Par sadarbeibu ar kinys režisoru Vīsturu Kairišu Dāvis soka: “Jis ir cīši praseigs. Līk maņ kai akteram daudz dūmuot par tū, kai justūs cyts cylvāks konkretā situacejā i kai maņ tū atspīgeļuot sovā tālā. Kinā ir cīši daudz nūtykumu, kuri myusu dīnuos ar parostu cylvāku nanūteik, pīmāram, Holokausts. Šausmys, kod cylvākus izdzan nu sātu, samat geto, tod vad nūsaut.” Tūpūšuos kinys nūtykumi nūsarysynoj paguojušuo godu symta 30. i 40. godūs, atkluojūt gon autoritaruo režima laiku Latvejā, gon Ūtruo pasauļa kara sarežgeitūs nūtykumus. Kinu uzjam piec Gunara Janovska romana “Pilsēta pie upes”, viņ par kinys volūdu izavālata latgalīšu.

Dāvja Suharevska atveiduotais tāls ir daiļkruosuotuojs Aņss, kura aizdavums pi dažaidu režimu ir puorkruosuot piļsātys šiļts. Nasaverūt iz tū, ka viesturiskais fons ir tragisks, kinā byušūt jaušams vīglums, jaunu cylvāku attīceibu jutekliskums i ari humors. Kinys golvonais tāls Aņss ar sovim it kai naivajim lāmumim pīdzeivoj eistu goreigu i eksistencialu ceļuojumu nu naveikla puiškina leidz nūbrīdušam veirīšam. Par Aņša tālu tuo atveiduotuojs soka: “Aņss ir lobs cylvāks. Muna kolege aktrise Agnese Cīrule ir sacejuse, ka Aņss ir vysgudruokais nu vysu kinys tālu. Es tam varātu pīkrist, jis ir tuolredzeigs i saprūt, kas ir labi i kas nav.”

Jaunais akters ir gondareits, ka bejuse īspieja struoduot kūpā ar profesionalim akterim – Agnesi Cīruli, Gundaru Āboliņu, Brigitu Cmuntovu nu Čehejis, kinā filmiejīs ari legendarais lītuvīšu akters Jozs Budraitis i c. Dāvis atzeist, ka kotra filmiešonuos dīna bejuse kai jauns izaicynuojums, bet vysgryušuok bejs īsavuiceit nu golvys tekstu vuociski, partū ka leidz filmiešonuos šaļtei nabejuse nikaida saskare ar vuocu volūdu.

“Piļsāta pi upis” byus vīna nu nadaudzūs Latvejā topušūs kinu, kurā varēs dzierdēt latgalīšu volūdu. Vaicojūt Dāvim, cik jam ir svareigi, ka kina byus latgaliski, jis atsoka: “Maņ tys reizē ir i nav svareigi. Ir svareigi, partū ka maņ pateik latgalīšu volūda i tei ir vīna nu munys dzeivis sastuovdaļu, prīcojūs, ka asu pīdzims Latgolā. Nu ūtrys pusis, latgalīšu vodūdu navajadzātu skaiteit par kinys atslāgu, tei nav atbiļde iz vysim naatbiļdātajim vaicuojumim. Iz kinu juosaver kūpumā, navajadzātu preparēt nivīnu atsevišķu sluoni. Kina byus skaista deļ vairuoku lītu, koč voi deļ aktrišu, myusim ir naaptverami šmukys aktrisis.”

Itūšaļt Dāvis studej kimeju i struodoj kosmetikys uzjāmumā “Madara Cosmetics”, bet atzeist, ka lobpruot sovu nuokūtni saisteitu ar aktera dorbu, ka viņ byutu taida īspieja. Kinys “Piļsāta pi upis” uzjimšona itūrudiņ turpynuosīs Kruoslovā i Rēzeknē, piec tam suoksīs montaža i īskaņuošona. Planavuots, ka kinu kinoteatrūs suoks izruodeit 2020. goda suokuos.

 

Publicitatis karteitis, autore Agnese Zeltiņa.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.