Rēzeknē prezentēs Annys Rancānis jaunuokū dzejūļu kruojumu

Portals lakuga.lv 15. Oktobris, 2018. gods Comments Off on Rēzeknē prezentēs Annys Rancānis jaunuokū dzejūļu kruojumu

Rokstu sagataveja: portals lakuga.lv

Bīdreiba “Latgolys Studentu centrs” sadarbeibā ar Rēzeknis Tehnologeju akademeju aicynoj iz Annys Rancānis jaunuokuos dzejis gruomotys “Prīca i klusiešona” attaiseišonys svātkim 18. oktobrī 18 stuņdēs.

Gruomotys prezentaceja nūtiks Rēzeknis Tehnologeju akademejā (Atbreivuošonys aleja 115). Vokora eipašais gosts byus muzikis Sovvaļnīks. Prezentacejis pasuokumā byus vareiba īsaguoduot gruomotu.

Gruomotā “Prīca i klusiešona” dzeja, kas leluokā daļā ir latgaliski i raksteita laikā nu 2012. da 2018. goda, sasamej ar dīnysgruomotys tipa eisprozys tekstim, kurūs poša autore sauc par naktsrokstim i kurūs hronologeja īzeimej saraksteišonu nu 2008. da 2011. godam. Iz tū atsaverūt, Anna atsazeist, ka tys sakrits ar krizis laiku i vaira tai navarātu raksteit. Bolstūtīs iz itūs naktsrokstu, 2017. goda aprelī Lūznovys muižā topa literari muzykals izvadums “Atlaižu”.

“Prīca i klusiešona” ir jau ostoitais Annys Rancānis dzejūļu kruojums. Dorbu kruojuma muokslineica ir Gundega Rancāne, kurū ar Annu saista attuola radnīceiba – obys guojušys nu vīnys Rancānu dzimtys dažaidu zoru. Sasadorbuot ar Gundegu Anna Rancāne gribiejuse jau seņ, jo ašņaradnīceiba nav bejs pats golovnais – svareiguoka ruodejusēs gareiguo tyveiba i dzeivis saprasšona – šaļtim ekspresiva, kruosaina, šaļtim niaņsāta i apcereiga. Gruomotā Annys literarūs dorbus izkruosoj ostonis Gundegys Rancānis gleznys, kū vīnā stuostā salykuse muokslineica, maketātuoja Daina Salmiņa. Kruojuma “Prīca i klusiešona” literaruo redaktore ir Ilze Sperga.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.

Komentari slāgti.