Izdūts monografiskys rokstu kruojums par Daugovpiļs nūvodu

Portals lakuga.lv 16. Oktobris, 2018. gods Comments Off on Izdūts monografiskys rokstu kruojums par Daugovpiļs nūvodu

Rokstu sagataveja: portals lakuga.lv

Latvejis Universitatis profesoris Janīnys Kursītis redakcejā izguojs monografisks rokstu kruojums “Daugavpils novads. Vietas vērtība”, kas raksturoj vīna Latvejis nūvoda kulturviesturiskū i dobys daudzveideibu. Juo attaiseišonys svātki – 26. oktobrī 14.00 stuņdēs Daugovpiļs nūvoda Vabalis pogosta kulturys nomā, kai informej projekta vadeituoja Jolanta Stauga.

Kruojuma pamatā ir 2016. i 2017. gods vosorā Latvejis Universitatis (LU) i Daugovpiļs Universitatis (DU) pietnīku i studentu kūpejuos mutvuordu viesturis i folklorys ekspedicejuos Daugovpiļs nūvodā īraudzeitais, sajustais, izpieteitais. Lai giutu dziļuoku i plašuoku īskotu, pīsaisteiti ari pietnīki, kuri napīsadaleja lauka pietejumūs, bet kuru zynuotnyskūs interešu lūkā ir nūtikšonys Daugovpiļs nūvodā.

Kruojumā Daugovpiļs nūvoda sovpateiba atkluota 23 publikacejuos, kas ītylpynuotys trejuos tematiskuos nūdaļuos: 1. Nūvoda identitate: stabilais un maineigais; 2. Nūvoda viesture, kulturviesturiskais i dobys montuojums; 3. Daugovpiļs nūvods 2016–2017: status quo i vaicuojumi nuokūtnei.

Autoru mierkis ir styprynuot sabīdreibā izpratni par ituos teritorejis kulturviesturiskū i myusdīnu nūzeimi, īpazeistynojūt ar daudzveideigu dobys i kulturys vidi, kas Daugovys obejuos pusēs cauri laikim vīnuojuse vysaidu etnosu, konfeseju i socialūs sluoņu puorstuovus.
Kruojuma autoru vydā ir i LU, DU i Latvejis Kulturys akademejis (LKA) vuiceibu spāki, i cytu instituceju nūzaris eksperti.

Gruomotys attaiseišonys svātkūs 26. oktobrī Vabalis pogosta kulturys nomā byus īspieja satikt rokstu autorus i gruomotys radūšū komandu, pīdzeivuot ekspediceju laikā topušuos Reigys Muokslys i medeju tehnikuma dokumentaluos kinys “No sētas uz sētu. Daugavpils novads” pyrmizruodi i baudeit Vabalis pogosta etnografiskuos kūpys “Vabalis” muzykalu puorsteigumu.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.

Komentari slāgti.