Aicynoj iz sasatikšonu par latgalīšu kulturys goda bolvu “Boņuks”

Portals lakuga.lv 18. Oktobris, 2018. gods Comments Off on Aicynoj iz sasatikšonu par latgalīšu kulturys goda bolvu “Boņuks”

Rokstu sagataveja: portals lakuga.lv

2019. goda februara beiguos jau 11. reizi tiks padūtys latgalīšu kulturys goda bolvys “Boņuks”. Gatavejūtīs ceremonejai i atsaverūt iz bolvys pyrmūs 10 godu, Latgolys viestnīceiba GORS i latgalīšu kulturys ziņu portals lakuga.lv 26. oktobrī aicynoj iz sasatikšonu i diskuseju par tū, kaidai byut bolvai iz prīšku.

Sasatikšonā i diskusejā 26. oktobrī 13.00 aicynuoti pīsadaleit kai pārnejūs godu bolvys žurejis puorstuovi, bolvys sajiemieji i nominanti, tai ari portala lakuga.lv skaiteituoji, latgalīšu kulturys interesenti i aktivisti, kab diskutātu i kūpā saprostu, kaidai byut latgalīšu kulturys goda bolvai “Boņuks” iz prīšku. Kab pīsadaleitu sasatikšonā, lyudzam pyrma tuo dasasaceit, da 24. oktobra vokora rokstūt iz bonuks@rezekne.lv. Bolva ir naatkareiga, navalstiskūs organizaceju dybynuota iniciativa. Tuos reikuotuoji nu 2013. goda ir Latgolys viestnīceibys GORS komanda, deļ tuo pyrma “Boņuka” jaunuos desmitgadis, GORS i lakuga.lv aicynoj iz sarunu i diskuseju par tū, kaidam byut “Boņukam” iz prīšku. Saglobuot voi maineit bolvys formatu, maineit voi namaineit nominantu dasaceišonu i viertiešonu, paplašynuot voi napaplašynuot nominacejis i cyti vaicuojumi.

Latgalīšu kulturys goda bolva “Boņuks” ir vīneiguo itaida mārūga latgaliskuos kulturys bolva Latvejā i pasaulī. Bolva teik taiseita ar mierki apkūpuot lobuokū padareitū i lobuokuos nūtikšonys pārnejā godā, gūdynojūt aktivuokūs latgalīšu kulturys puorstuovus, popularizātuojus, veicynojūt jaunradis i kulturys daudzveideibys atteisteibu iz prīšku. Par padareitū 2017. godā bolvys tyka padūtys 19 nominacejuos. Desmit godu laikā Latgalīšu kulturys goda bolvu “Boņuks” sajiemuši 232 ļauds, nūtikšonys, projekti i cytys aktivitatis.

Šaļteņu piečuok piec sasatikšonys beigu, četruos stuņdēs piec pušdīņu, Latgolys viestnīceibys GORS Muokslys galerejā aicynojam iz pārnejuo goda bolvys sajiemiejis Annelis Slišānis projekta #100dečiLatvijai gruomotys attaiseišonys svātkim.

Sasatikšona par latgalīšu kulturys goda bolvu “Boņuks” teik taiseita sadarbeibā ar latgalīšu kulturys ziņu portalu lakuga.lv, kas ir vīneigais portals pasaulī, kurymā kotru dīnu puorskaitomys jaunys viests latgaliski. Portals lakuga.lv ilgus godus ir ari latgalīšu kulturys goda bolvys “Boņuks” informativais atbaļsteituojs, gon viestejūt par bolvys jaunumim, gon aicynojūt portala skaiteituojus nūbolsuot par sovom simpatejom nu bolvys nominantu vyda.

Latgalīšu kulturys goda bolvys “Boņuks 2018” ceremoneja byus 2019. goda 24. februarī Latgolys viestnīceibā GORS. Vaira par bolvu: http://bonuks.lv i http://latgalesgors.lv.

“Boņuks 2018” nūtikšonu atbolsta Vaļsts kulturkapitala fonda Latgolys kulturys programa.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.

Komentari slāgti.