“Latgalīšu Reps” puorsteidz ar jaunu video “Reita panorama”

Portals lakuga.lv 18. Oktobris, 2018. gods Comments Off on “Latgalīšu Reps” puorsteidz ar jaunu video “Reita panorama”

Rokstu sagataveja: portals lakuga.lv

Papyldynuota pyrmuo i ūtruo ryndkūpa.

Hip hopa apvīneiba “Latgalīšu reps” fanu viertiejumam nūdavuse sovu jaunuokū veikumu – videoklipu “Reita panorama”. Video taps sadarbeibā ar Sudrabu Sirds i Dj Aspirins.

Reits – dīnys pūsms, kod cylvāks pasamūst ar svaigu pruotu, kab apstruoduotu dūmys par jaunom īcerem i planim. Kotram ir sovs ceļš i kotrs pats izavielej, cik styprys byus mīgs piec struodeigi ci slynki pavadeitys dīnys. Kaids izmontuos vysys vareibys, bet cyts namaineis nikuo, par jaunū dzīsmi stuosta Ivo Grigalis. 

Apvīneibys pamatsastuovā dorbojās Ivo Grigalis i Didzis Kozlovs nu Ludzys. Atpazeistameibu “Latgalīšu reps” īmontuoja 2017. gods vosorā ar videoklipu “Skots pa lūgu”, kas eisā laikā kliva par vīnu skateituokūs latgalīšu muzykys video vītnē youtube.com. Latgaliskais reps ir īkaruojs Latvejis muzykys klauseituoju sirds, jau lobu laiku turutīs Radejis Pīci latvīšu muzykys TO 20 augšgolā ar dzīsmi “Žārei gaļi”.

“Latgalīšu reps” par sovu veikumu pārn sajiems treis Latgalīšu kulturys goda bolvys “Boņuks” – par goda debeju muzykā, par lobuokū snāgumu alternativajā muzykā i par lobuokū muzykys video.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.

Komentari slāgti.