Albums “Dvieselis steigys” – duovona nu Amerikys latgalīšu

Portals lakuga.lv 1. Novembris, 2018. gods 0
Publicitatis karteite.

Rokstu sagataveja: portals lakuga.lv

Gatavejūtīs Latvejis symtgadis svātkim, muzykaluo apvīneiba “Teksasys Latgalīši” i muzike Aija Nagle-Īzāka nu ASV īrakstejuši albumu “Dvieselis steigys”, kurymā apkūpuotys labi zynomys latgalīšu i latvīšu melodejis jaunā interpretacejā. Sagaidūt Latvejis symtgadi, albums tiks prezentēts Rēzeknē, Daugovpilī i Reigā, informej Gunta Ločmele.

Ideja par itaida albuma veiduošonu roduos Amerikys latgalīšim Teksasys štatā – muzikei i vijūļneicai Aijai Naglei-Īzākai i Latvejis Republikys Gūda konsulam Pīteram Aloizam Ragaušam. Apsavīnojūt profesionalim muzikim, tyka radeita apvīneiba “Teksasys Latgalīši”, kas kūpeigim spākim eistynuoja Aijis i Pītera Aloiza senejū sapynu par eipašu muzykys izlasi, kurymā jaunā interpretacejā pasnāgtys tautā īmeiļuotys latgalīšu i latvīšu dzīsmis. Jaunais albums paruoda, cik daudzveideiga ir latvīšu muzyka i cik dažaidi var interpretēt pazeistamys melodejis. Albumā “Dvieselis steigys” klausamys gon tautysdzīsmis, gon pazeistamu Latgolys muziķu – Kristapa Rasima, Jura Ostrovska, Artura Uškāna, Arņa Slobožanina, Guntrys Kuzminys-Juknys, kai ari cytu izpiļdeituoju i autoru dzīsmis jaunā aranžejā.

Albuma “Dvieselis steigys” īceris autors i mecenats Pīters Aloizs Ragaušs dzims latgalīšu saimē ASV. Jis ir uzjiemiejs i Latvejis Republikys Gūda konsuls Teksasā. Plašuokai publikai Latvejā Pīters Aloizs Ragaušs kliva pazeistams pasasokūt režisora Jāņa Ozoliņa-Ozola kinai “Likteņzeme”. Tymā paruodeits latgalīšu rakstnīka i sabīdryskuo darbinīka Andryva Jūrdža dzymtys stuosts i juo piecguojieju Pītera Aloiza i Helenys Ragaušu pyrmuo sasatikšona ar rodim, kurī Ūtruo pasauļa kara laikā nūkliva Sibirī.

Sovpus, Aija Nagle-Īzāka dzymuse i auguse pošā Latvejis Austrumu pīrūbežā – Kuorsovā. Jau bārnu dīnuos jei īsadvesmuoja nu sova vacvactāva, vijūļu meistara Aloiza Nagļa i vuicejuos spieļuot vijūli Kuorsovys muzykys školā. Vāluok sovys muzykaluos prasmis jei papyldynuojuse Jāzepa Vītola Latvejis muzykys akademejā i Nikolaja Rimska Korsakova konservatorejā Krīvejā. Aija spieļuoja pyrmū vijūli Latvejis Nacionaluos operys i baleta simfoniskajā orkestrī, Rītumvirdžinejis simfoniskajā orķestrī, kai ari bejuse Hjustonys simfoniskuo orkestra koncertmeistare. Aija sovys muzykaluos prasmis paruoda ari itamā albumā na viņ spielejūt vijūli, tok ari aranžejūt skaņdorbus.

Jau pavysam dreiži Aija Nagle-Īzāka gasteis Latvejā, kab kūpā ar Latvejis muzikim prezentātu jaunū muzykys izlasi “Dvieselis steigys”. Sevkurs muzykys cīneituojs aicynuots iz albuma prezentacejis nūtikšonys: 16. novembrī 19.00 stuņdēs Rēzeknis kulturys nomā, 19. novembrī 20.00 stuņdēs restoranā “Plaza” Daugovpilī, 20. novembrī 19.00 stuņdēs Reigā “Kino mājā”. Īīšona koncertūs bezmoksys. Pyrma koncertu sevkuram byus vareiba albumu nūpierkt. Sovpus tīšsaistē albums “Dvieselis steigys” jau daīmams “Spotify”, “iTunes” i “Deezer”.

Muziki sataisejuši video ar Kristapa Rasima i grupys “Bez PVN” izpiļdeitū dzīsmi “Screen” jaunā skaniejumā, aranžiejumu veiduojuse Aija Nagle-Īzāka.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.