“Skonai” pīduovoj rudineigu vidoklipu dzīsmei “Rūžu duorzi”

Portals lakuga.lv 7. Novembris, 2018. gods 0
“Skonai” publicitatis karteite

Rokstu sagataveja: portals lakuga.lv

Rēzeknis nūvoda vokaluo studeja “Skonai” pīduovoj nūsavērt jaunu videoklipu, kas sataiseits dzīsmei “Rūžu duorzi”.

Dzīsmis “Rūžu duorzi”, kurys muzykys autore ir “Skonai” vadeituoja Guntra Kuzmina-Jukna, bet teksta pamatā ir Ilzis Spergys dzejūļs, kas sovulaik publicāts myusdīnu latgalīšu dzejis antologejā “Susātivs”, videoklipā īmyužynuots Lūznovys muižys parka zalta rudiņa kruosu spylgtums. Dzīsme dūd drupeit rudiņa melanholejis, i tuos melodiskajūs akordūs var maneit ilgys piec syltuma, ari suocūtīs goda soltajai sezonai, bet “Rūžu duorzi” ritmys atguodynoj par rudiņa spāku i aicynoj tū napīmierst. Dzīsmi “Rūžu duorzi” producieja i aranžieja Gints Stankevičs, bet videoklipu fiļmēja i taiseja Māris Justs.

Rēzeknis nūvoda vokaluo studeja “Skonai” dybynuota 2012. goda beiguos, kod studejis vadeituoja Guntra Kuzmina-Jukna eistynuoja sovu sapynu – atsagrīze dzeivuot i struoduot dzymtajā Rēzeknis nūvodā. Pārnejuo goda golā studeja nūsvietieja pīcu godu jubileju, izdūdūt bārnu dzīšmu disku latgaliski kai veļtejumu Ontonam Slišānam “Rūtaļa”, taipat reizē izguoja ari Guntrys pošys dzīšmu gruomota-notu kruojums “Sirdsgunteņa”. Vokalajā studejā dorbojās bārni i jaunīši četruos vacuma grupuos. “Skonai” divejis reizis sajiemuse ari latgalīšu kulturys goda bolvu “Boņuks” – par 2014. goda lobuokū debeju muzykā i par videoklipu dzīsmei “Skani, debesteņ”, kuru ari beja taisejs Māris Justs.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.