Izguojs 5. raidejums “Laika leigučuos”

Portals lakuga.lv 8. Novembris, 2018. gods 0
Andris Eriņš. Publicitatis karteite.

Roksta autors: Latgolys entuziastu grupa “Biļdis”

Nūvodvuiceiba, sovys volūdys i dzymtuos pusis izzynuošonys napīcīšameiba Baļtinovys pusē vysūs laikūs bejuse pošsaprūtama i naaizstuojama. Imants Slišāns i juo davums dzymtuos vītys i latgalīšu volūdys vuiceišonā kūpš Latvejis naatkereibys atjaunuošonys ir raidejuma “Laika leigučuos” redzislūkā.

Latgolai nūzeimeigu personeibu rubrikā raidejums teikās ar Andri Eriņu i uzklausa juo atminis par drūsmeigū darbeibu pyrma Latvejis naatkareibys atjaunuošonys, Latvejis Tautys froņtē, par barikažu laiku, par styprū puorlīceibu i dareišonu sovys zemis i tautys lobā.

Latgolys kulturtelpys aktualitašu sadaļā “Laika leigučuos” turpynoj informēt par Latgolys kongresa symtgadis atzeimuošonā aktualizātajom temom, prūti, Latgolys kulturviesturis muzejā izveiduotuos tematiskuos izstuodis “Puori slīkšņam” nūzeimi sabīdreibys izgleituošonā par moz pieteitū i atspīgeluotū temu.

Raidejums “Laika leigučuos” taps ar Vaļsts regionaluos atteisteibys agenturys mierkprogramys “Regionalūs i vītejūs medeju atbolsta programa” apakšprogramys “Atbolsts sabīdriski nūzeimeigys žurnalistikys radeišonai medejūs Latgolys planavuošonys regionā” atbolstu.