Aicynoj dasasaceit unikalai vuiceibu spēlei i atrast sovu eistū dorbu

Aicynoj dasasaceit unikalai vuiceibu spēlei i atrast sovu eistū dorbu
Publicitatis karteite.

Rokstu sagataveja: portals lakuga.lv

Itūgod pyrmū reizi nu 24. novembra da 8. decembra sadarbieibā ar “British Council” puorstuovnīceibu Latvejā, Daugovpiļs piļsātys dūmi, Daugovpiļs Universitati i vuiceibu centru “Cilvēkam” teik organizātys bezmoksys teišsaistis vuiceibys “Atrodi Savu Aizraušanos” Latgolys īdzeivuotuojim nu 18 da 50 godu, portalu lakuga.lv informej Elīna Biseniece.

“Priņcips ir vīnkuoršs. 15 dīnys kotru reitu sovā datorī ci telefonā sajam vīnu div aizdavumus, kai meklēt sovu eistū aizaraušonu, dorbu, nūzari. Da pusnakts juoīsyuta atbiļdis. Teišsaistis slāgtā grupā īsadvasmuosi nu cytu daleibnīku, varbyut pat dabuosi jaunus dūmubīdrus.

Treis sastdīnis vuiceisimēs kūpā kluotīnē, kur sajimsi treneru atbiļdis iz sovim vaicuojumim, īsapazeisi ar cytim daleibnīkim, apsamaineisi ar pīredzi,” tai par spēli soka juos treners Zuarguss Zarmass nu vuiceibu centra “Cilvēkam”.

Pīredze tam, kaidys metodis struodoj, jam kūpā ar treneri Laumu Žubuli kruota, pasnīdzūt vaira par 1000 lekceju par emocionalū intelektu. Tūs skaitā, sasadorbojūt ar taidim storptautiskajim uzjāmumim kai “AirBaltic”, “CircleK”, “Samsung”, “Luminor”.

“Struodojūt ar lelajim uzjāmumim, pietejūt tendeņcis, vys vaira radzu, cik spēle ir svareiga kotram,” komeņtej Z. Zarmass. “Muoksleigais intelekts lānom atjam dorbus cylvākim, partū ir eipaši svareigi atrast nūzaris, kurys patīsi pateik, i ir ar mozuoku īspieju aizstuot ar mašynom. Tys ļaus i konkurēt dorba tiergā, i lobuok izturēt stresu – ir pīruodeits, ka dorūt dorbu, kas pateik, stresam ir mozuoka ītekme iz myusu veseleibu. Tys sovutīs ļaun veseleiguok dzeivuot, pylnvierteiguok sātā pavadeit laiku ar saimi.”

“Spēle ir tys, kū parosti navuica školuos. Metodis ļaun nūgaļdeit saimis, sabīdreibys, draugu izlyktuos gaidys i apsastuot – kas ir tys, kū es patīsi grybu dareit? Eistuos atbiļdis parosti nav juovaicoj gudruos gruomotuos ci cytu padūmūs – juos varim atrast poši sevī, pietejūt tū, kas pat seikumūs saguodoj prīcu,” soka “Cilvēkam” trenere L. Žubule, kura ar naformalom izgleiteibys metodem struodoj jau vaira kai 10 godus.

“Lela prīca, ka Latgolys īdzeivuotuojim ir tik unikala īspieja tū apgiut bez moksys, partū taids ari ir myusu mierkis – padareit ituos metodis maksimali daīmamys sabīdreibai. Paļdis “British Council” i Daugovpiļs dūmei, kuri itaidu pasuokumu dabuojuši varamu,” papyldynoj Z. Zarmass.

Spēle nūtiks teišsaistis režimā nu 24. novembra da 8. decembra, ar trejom kluotīnis tikšonuos reizem Daugovpilī 24. novembrī, 1. i 8. decembrī. Aizdavumi i kluotīnis vuiceibys nūtiks latvīšu volūdā, sovutīs atbiļdis iz aizdavumim varēs īsnīgt latvīšu ci krīvu volūdā piec izvēlis.

Daleibnīku atlase nūtiks, izviertejūt dasacejuma anketys. Vītu skaits īrūbežuots. Dasasaceišona da 18. novembra.

Dasacejuma anketa latvīšu volūdā: https://ej.uz/anketaLAT
Dasacejuma anketa krīvu volūdā: https://ej.uz/anketaRU

Vuiceibu spēli organizej vuiceibu centrys “Cilvēkam” sadarbeibā ar “British Council” puorstuovnīceibu Latvejā, Daugovpiļs piļsātys dūmi i Daugovpiļs Universitati.

“Cilvēkam.lv” vuiceibu centrys ir radīs kai dūmubīdru iniciativa 2010. godā, kab paleidzātu cylvākim atteisteit tuos dzeivis prasmis, kū izgleiteibys sistema da pat ituo breiža vēļ navuica – komunikaceja, stresa vadeiba, empateja, motivieteiba, kai atrast sovu aizaraušonu i c.

“British Council” ir Lelbritanejis storptautyska organizaceja kulturys attīceibu jūmā. Jei roda storptautyskys īspiejis Lelbritanejis i cytu vaļstu īdzeivuotuojim, kai ari veicynoj sovstarpeju uzaticiešonu vysā pasaulī.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.