Suokusēs latgalīšu literaturys populariziešonys akceja “Dūmoj ar komatim!”

Suokusēs latgalīšu literaturys populariziešonys akceja “Dūmoj ar komatim!”

Roksta autors: portals lakuga.lv

Šudiņ suocās latgalīšu literaturys i volūdys populariziešonys akceja “Dūmoj ar komatim!”, kurymā ar video i postkartem latgalīšu kulturys aktivisti rauga pīvērst viereibu latgaliski radeitim literarim dorbim i latgaliski raksteitim tekstim, viestej bīdreibys “Latgolys Producentu Grupa” publicātuo informaceja.

Iz vysa vuoreiguokuo latgalīšu myusu dīnu kulturys daļa pošu reizi dīvamžāļ ir literatura. Statistikā par tū līcynoj kai nalelais kotru godu latgaliski izdūtūs gruomotu skaits, tai ari Latgalīšu kulturys goda bolvys “Boņuks” nominacejis – bolvys nūtikšonys desmit godu laikā literaturys nominaceju skaits pretendentu tyukuma deļ nu sešu pyrmajā godā (2008) niu ir sasamazynuojs da diveju (vysmoz padejūs četrus godus). Jaunu augstvierteigu (kas daboj īviereibu vysā latvīšu literaturys laukā) dorbu ir cīši moz, taipat literatura latgaliski nav dyžan bīža izvēlē skaiteituoju vydā. Kab veicynuotu latgalīšu literaturys popularitati, atpazeistameibu i ari skaiteišonu latgaliski, bīdreiba “Latgolys Producentu Grupa” sadarbeibā ar bīdreibu “Kukuži” eistynoj projektu-akceju “Dūmoj ar komatim!”, kuruos mierki ir planavuots sasnēgt ar 15 literarūs dorbu vizualizacejom, kurymuos skanēs Latgolys kulturā zynomūs ļaužu īrunuotī vysaidu laiku i vysaidu latgalīšu autoru literarī dorbi, i diveju postkaršu paleidzeibu, kuruos byus daīmamys kotram grybātuojam Reigā i Latgolā bez moksys.

Ideja par “Dūmoj ar komatim!” roduos latgalīšu literatam Oskaram Orlovam (Raibīs): “Ideja par “Dūmoj ar komatim” roduos vysā paseņ, verūtīs literarūs procesus uorzemēs, kur gruomotom teik taiseiti treileri, i cytys mini publicitatis akcejis. Tok tys pi myusu eipaši plaši nateik izmontuots.

Itymā informativajā pasaulī eipaši literaturai vajadzeigs jauns, aizraunūšs, kūduleigs veids, kai jū pasnēgt, varbyut īiņteresēt skaiteituoju/klauseituoju. Literatura – tei ir mysudīnu cylvāka naatkareiba.

Pošam pīsadolūt vysaiduos dzejis i prozys nūtikšonuos, asu nūvāruojs, ka cytu reizi pošim autorim ir biklums i navareiba runuot sovus goradorbus i rakstnīkam na vysod tys ari ir juodora. Jam teksti juoroksta, na juodūmoj, kai jī juopasnādz auditorejai. Deļ tuo ari itūreiz tekstus runoj cyti – latgaliskajā sabīdreibā zynomi ļauds.”

Oskars akcejai izlasejs 15 vysaidu laiku i vysaidu latgalīšu literatu dorbus – video vizualizacejis pīdzeivuos Ontona Slišāna, Annys Rancānis, Antona Kūkoja, Raiņa, Valentina Lukaševiča, Naaizmierstulis, Fraņča Trasuna, Anitys Mileikys, Karonhisakis, Juoņa Klīdzieja, Aleksandra Garanča, Eduarda Krustāna, Augusta Egluoja, Līgys Rundānis i ari vīns poša dorbs. Autoru vydā akcejis reikuotuoji gribiejuši paruodeit vysmoz 100 godu ilgu i vysaidu latgalīšu literaturys periodu.

Literarūs dorbus īrunuos dzīsminīks Kārlis Kazāks, uzjiemiejs i grupys “Bez PVN” muzikis Jurs Vucāns, “Ausmeņa Kebabs” saiminīks Valters Murāns, apvīneibys “Ausmeņa Records” repere Ūga, žurnaliste i literate Evika Muizniece, horeografs Ilmārs Dreļs, Rēzeknis Tautys teatra akters i muzikis Oskars Lustiks, Latgolys viestnīceibys GORS vadeituoja Diāna Zirniņa, grupys “Galaktika” muzikis Normunds Zušs, školuotuojs, režisors i multimuokslinīks Māris Susējs, akters, pasuocīņu vadeituojs i grupys “Bez PVN” muzikis Kristaps Rasims, sportiste Gunta Vaičule, žurnaliste i Rēzeknis Tautys teatra aktrise Anita Graudiņa, dzīduotuojs Dainis Skutelis i kinys “Piļsāta pi upis” golvonuos lūmys tāluotuojs Dāvis Suharevskis.

Itūnedeļ publiski bīdreibys “Latgolys Producentu Grupa” profilūs socialajūs teiklūs Youtube i Facebook tiks atruodeitys pyrmuos pīcys literarūs dorbu vizualizacejis, kurūs idejis i tehniskū rysynuojumu radejuši Viola Lapa i Guntis Rasims, bet postkartis, kurymuos īmyužynuoti ituo goda jubilaru – Valentina Lukaševiča, kurs nūsvietieja 50 godu jubileju, i Ontona Slišāna, kurs byutu svietejs 70, dorbu fragmenti, topušys sadarbeibā ar postkaršu reklamys servisu “Baddog” i ir jau pajemamys stendūs vaira nikai 30 vītuos Reigā, bet da decembra gola bez moksys byus daīmamys ari Latgolā – dažaiduos kopejneicuos, bibliotekuos, školuos i cytuos vītuos Rēzeknē, Daugovpilī, Preiļūs, Ludzā i cytur. Puorejī desmit video internetā pa drupeišam tiks publicāti da 2018. goda beigu. Latgalīšu literaturys populariziešona video formā pajimta, jemūt vārā ituo medeja veida myusudīnu aktualitati, kai ari vīgluokū i ārtuokū ceļu auditorejis sasnēgšonai, bet postkartis ir pyrmais aicynuojums latgalīšu literaturys dorbu “pajimt leidza”, turūt nūceju, ka cytureiz “leidzajimšonai” kaids jau pats varātu izavēlēt latgaliski raksteitu gruomotu.

Latgalīšu literaturys populariziešonys akceju “Dūmoj ar komatim!” bīdreiba “Latgolys Producentu Grupa” eistynoj ar Latgolys kulturys programys atbolstu. Planavuots, ka akceja ar jaunim video i postkartem varātu turpynuotīs ari cytugod.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.