Kod rakstiet “i” i kod “y”?

Kod rakstiet “i” i kod “y”?

Rokstu sagataveja: portals lakuga.lv

Lai ari latgalīšu rokstu volūda ir cīši tyva latvīšu literarajai volūdai, raksteibys nūsacejumi obejom atsaškir. Turkluot latgalīšu volūdā ir burts y, kuruo nav latvīšu literarajā volūdā. Tū izrunoj cītuok nakai parostū i, leidzeigi krīvu volūdys burtam ы. Bīži viņ rūnās vaicuojums, kod raksteit y, bet kod i? Portals lakuga.lv skaidroj par itūs patskaņu lītuojumu.

Svareigi atguoduot, ka latgalīšu rokstu volūdā vuordi nasasuoc i nasabeidz ar y, koč ari piec dzierdis tai reizem gribīs raksteit. Vuorda suokumā roksta iu – iudiņs, na yidiņs; iudris, na yidris. Ari vuorda beiguos byus i, na y, pareizi byus vylki, na vylky.

Rokstu volūdys nūsacejumi paredz, ka aiz burtim g i j roksta i (na y). Pareizi ir giut, kimūss, jiura. Sovukuort aiz burtim č, r, š, ž roksta y voi yu: čyuska, (maizis) ryka, šyut, žyds. Izjamūt gadīņus, kod nuokušajā ziļbē ir meikstynuotuoja skaņa i, ī, ē, ē, ie, ei, iu, tod roksta čiuskeņa, (maizis) riceņa, šivieja, žideņš.

Puorejūs gadīņūs, kas naīsakļaun īprīšk nūruodeitajuos kategorejuos, īsoka raksteit piec dzierdis, paraudzeit izrunuot obejus variantus i raksteit tū, kas skaņ dabiski. Pīvadumam, mes sokom vysta (navys vista), bet visteņa (navys vysteņa), viļkt, sylts, lyzguot, likt i tt.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.