Arņs Slobožanins veļtej dzīsmi Ontonam Slišānam

Arņs Slobožanins veļtej dzīsmi Ontonam Slišānam

Rokstu sagataveja: portals lakuga.lv

Vīns nu spūdruokūs latgalīšu dzejnīku Ontons Slišāns 28. decembrī svynātu sovu 70 godu jubileju. Arņa Slobožanina jaunuo dzīsme “Puosoka” pyrmom kuortom ir veļtejums pošam Ontonam, juo saimei i dzymtajam Viļakys nūvodam. Saprūtams – ari vysim Ontona dorbu i Latgolys muzykys mīļuotuojim.

Dzīsmis autors atsazeist: “Ontona Slišāna vuordi, kurus najauši atrodu škārsteiklā, pa manam, stuosta par tū, ka vyss, kū dorom ci rodom, nazkod jau ir bejs. Mes viņ vēļreiz i vēļreiz atsagrīžam pi tuo, kū cyti reiz mieginuojuši paviesteit. Saprūtams – kotram ir sovs ceļš i kotram ir sovs unikalais stuosts. Tys ir kai šaha spēlē – figurys tuos pošys, a kombinacejis ir naizsmeļamys.
Zeimeigi ir ari tys, ka dzīsme tyka radeita, kluotasūt Ontona unukam Dominikam, kurs radūšuo procesa laikā kūpā ar mani spēlēja ukuleli.”

Īrokstā pīsadaleja Arņs Slobožanins (bolss, bass, gitarys), Amanda Lapa (bungys, klavīris). Dzīsme īraksteita Kuorsovys nūvodā, skaņu īrokstu studejā “Bozova”. Miksēja Armands Treilihs. Videoversejis autors – Ivars Utināns. Filmāta Daugovpiļs nūvodā, Augšdaugovā. Ar dzīsmis tekstu video papyldynuoja Artūrs Slišāns.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.