Roksta autors: Ināra Volkova, žurnals “A12”

Rēzeknis piļsātys pīvuortē, Janapolē 20. godu symta pyrmajā pusē dzeivuoja i radūši dorbuojuos Romeru dzymta. Anna Soltane-Romere kai muokslineica beja pazeistama Latvejā i Eiropā, daudz ceļuoja i organizēja sovys muokslys izstuodis.

Muokslineica akvarelī gleznuoja Janapolis dzeivis ainys i dobys skotus. Juos modeli beja muižys apleicīne i satyktī ļauds. Storp ainovom taišni portrets ījam nūzeimeigu vītu i niule ituos viesturiskuos sejis atkluoj pyrmskara Latvejis lauku cylvāku. Ari tuo laika lauku sadzeivei soveiguo ainova īmyužynuota akvarelī, rūsynūšuo i na italiski klusuo doba – ūlys, vodka i barankys. Ci ari glezna “Vaņka Orlovs, staravers nu Bondaru” – puiss kuorteigā vuškys kažukā pi cepļa ar samovaru. Dagūšys zylys acs i dzeivisprīca jaunaveigajā sejā tūreiz ir īdvasmuojušys akvarelisti, bet niule atguodynoj dzeda jauneibys laikus. I vēļ vacuo aukleite Aņa Proveja pi tipiskys boltys lauku plitenis, kūka calma beņči i cepļa molā syldomim muola žbanim i lauku meitinis ružovim byudim kruosainūs skustūs. 1939. gods gleznā Feimaņu ceļmolys krysts akmiņu kruovuma molā ar cereņu kryuma rūtuojumu. I tei poša gods glezna ar Rāznys azaru, kura krostūs nav radzamys nīdris. Gleznuos atainuota ir daudzvīt jau pagaisušuo Latgolys lauku ainova i aizmierstuo nūskaņa.

Ari poša Janapolis muižys āka ir sasaglobuojuse viņ gleznuos ci fotografejuos, par juos vītu atguodynoj vacais muižys parks. Latgolys Kulturviesturis muzejs ir veics pietnīcyskū dorbu par pūļu muižnīku Romeru dzymtu, kura Latgolā dzeivuoja da 1939. goda. 2016. godā piec Romeru dzymtys nasavteigys grybys, Latgolys Kulturviesturis muzejs Reigā, LR Uorlītu ministrejā, sasadorbojūt ar Latvejis viestnīceibu Kanadā, muzejs sajēme apjūmeigu Romeru dzymtys duovynuojumu – vaira kai 200 vīneibys, kas apjam i muokslineicys Annys Soltanis-Romeris gleznys, i dzymtys relikvejis.  

Roksts sagataveits ar Vidis regionaluos atteisteibys agenturys finansialu atbolstu nu Latvejis budžeta leidzekļu projekta “Sabiedrības un reģionu robežlīnijas žurnālā A12”.