Roksta autors: Ināra Groce, žurnals “A12”

Malinova ir izavītuojuse viņ napylnus divdesmit kilometrus nu Daugovpiļs i te dzeivojūšajim kasdīnā ir ārtai tikt iz dorbu ci vuiceibom ūtramā leluokajā Latvejis piļsātā. Apdzeivuotuo vīta izauguse pieckara godūs bejušuos Malinovkys sādžys vītā kai cīma padūmis i kolhoza centrys.

Vēļ pyrma godu desmit Daugovpiļs nūvoda Malinovys cīms rūtojās ar vyskūšuokajom sātom i lūgu kūkgrīzumim zali zyluos i sorkaneiguos kruosu gammuos. Vysom kūka sātom ir bejs leidzeigs planavuojums i izvītuojums, juos vīnuoja na viņ kvarbatkys lūgūs, bet ari kruosaini sliegi. Paaudzem puorsamejūt, dažys ākys ir byutiski puorbyuvātys, īlīkūt plastmasys lūgus i nūraunūt dekorativūs lūgu graznuojumus. Dažys sātys ir sabrukušys. Bet daudzom eipašnīki dzeivoj uorzemēs ci cytuos piļsātuos, i kūka sāta ir kai rezervis variants lobuokim laikim puordūšonai ci izmontuošonai par vasarneicu.

Ari ite sātys tyka pierktys 50. godūs, i, kai soka vīna nu eipašneicu, vysod juos kruosuoja zaļā kruosā. Par sābrim stuosta, ka kūka sātys Malinovā ir nūpierktys, bet bīži viņ tik taipat ir pamastys. Vīnu sātu, kuru navariejuši veiksmeigi puordūt, pat paduovynuojuši bazneicai. Vairums sātu teik apšyutys ar plastmasu i myusu apvaicuotuo eipašneica taišni plastmasu pīzeist par vyslobuokū apdaris materialu – nav juokruosoj i jei ir ilglaiceiga. Vīneigi lūgu slieģus atstuošūt i napuormeišūt. I sāta izavērs kai vysys plastmasys kasteitis – bezpersoniska, tok uzturiešonā problemu mozuok, i taidi paraugi ceļa moluos pasaruoda gona bīži.

Malinovys cīmā sastūpam Larisu, kura dasaver unukus bārnu īguoduotajā sātā. I beidzūt sastūpam vīnu lobu pīmāru, ka vacajā kūka sātā var izveiduot syltu i ārtu mitekli, saglobojūt i kūka slieģus, i kruosuojumu, kūka kvarbatkys, i tei ir dzeivuošona dabeigā vidē. Larisa soka, ka kūkgrīzumus jau izsvīž cylvāki, kuri itamuos kvarbatkuos nasaredz vierteibu. Sāta izaver daudz lapnuok i graznuok, ka sātys fasadi nūkruosoj i kūka lūgus i rūtuojumus atstuoj. Sūpluok dzeivojūšī sābri nūplēse i sadadzynuoja lūgu apmaļu kvarbatkys. Sūpluok dzeivoj vēļ vīna babeņa, pi kurys atbrauc bārni, bet sāta jau zuolē īauguse. Viņ vaci ļauds te ir palykuši, vysi puorejī ir aizbraukuši peļņā. Tok Larisys bārni ir apmīrynuoti par īguoduotū kūka sātu i jau trešū zīmu dzeivoj Malinovā, ir sakūpuši apleicīni i izveiduojuši pībraucamū ceļu.

Roksts sagataveits sadarbeibā ar portalu lakuga.lv ar Vaļsts regionaluos atteisteibys agenturys finansialu atbolstu nu Latvejis budžeta leidzekļu projektā “Robežlīnijas”.