Kvarbatkys Avotiņos

Kvarbatkys Avotiņos

Roksta autors: Ināra Groce, žurnals “A12”

Turpynojam īsapazeit ar kvarbatku sātom-ledejom ceļa moluos. Itūreiz – šoseja A13 Rēzekne–Daugovpiļs. Meža īlūkā aiz Maltys cīma ir pazeistamais ceļmolys olūts, kur kotru dīnu daudzys pošmuoju i uorzemu mašynys pīstuoj, kab braucieji pīlītu butelis ar olūta iudini. Te ari atrūnam sātu zemis tūņūs ar bīzom lūgu kvarbatkom – “Avotiņi“, sātys saimineicai Melānijai Goršakovai jau 92 godi. Āka tyka īguoduota paguojušuo godu symta 50. godūs. Sāta iztureiga i pamateigi byuvāta, kai soka poši īdzeivuotuoji – nanūsytama sāta. Pyrmī saiminīki asūts bejuši tureigi, greidu lykuši nu bolku, na dieļu, zuodžejūt jūs iz pusem. Saiminīkim pateik lūgu kvarbatkys i, syltynojūt sātu, juos ar pītati saglobuotys, kab lūgu apmaļu izgrīzumi palyktu. Izzinim, ka paguojušuo godu symta suokuos, kod sātu cēle, apleicīnē budaunīki ar jim asūts sasacantuši, kam kūšuoki i sovpateiguoki, tai sovys prasmis reklamējūt i nūdrūsynojūt pasyutejumus.

Vyšku cīmā celi sasazoroj iz Dubnu, Kolupu i Ambelim. Ceļa mola Dubnys vierzīnī nazkod ir bejuse tierdznīceibys īla, kuramā dzeivuojuši i tierguojušīs žeidi. Piec tam sātys tyka puordūtys. Regīna Baltace izruoda sovu sātu, veikala tierdznīceibys lūgs te ir sasaglobuojs nu Pyrmuos Latvejis breivvaļsts laiku. Sātā asūte puormejuse lūgus i greidys, dīmžāļ kūšuos i gaumeigi grīztuos lūgu aplūdys vaira natyka izlyktys, nanūvērtēja i sadadzynuoja. Vysmoz pīcu sātu eilē puorejūs lūgus kūkgrīzumi rūtoj. Regīna gon vaira stuosta par sābrim – Kolupa īlā gondreiž sevkurā ūtramā sātā asūts aizguojuši myužeibā, bet jaunuos saimis iz teni dzeivuot naīt. Sāta byutu juoatjaunoj, bet kurs gon tū dareis? Meitai saime Gruzejā, dāls jau pensionars i dzeivoj Rēzeknē, kai dzeivuot laukūs, ka dorba nav? Struodoj jau viņ pogosts i škola. Nav lels pīprasejums iz sātu pierkšonu Vyšku cīma ceļa molā.

Roksts sagataveits sadarbeibā ar portalu lakuga.lv ar Vaļsts regionaluos atteisteibys agenturys finansialu atbolstu nu Latvejis budžeta leidzekļu projektā “Robežlīnijas”.